කොරෝනා වසංගතය හේතුවෙන් ඇමෙරිකා එක්සත් ජනපදය, එක්සත් රාජධානිය සහ ස්පාඤ්ඤය රටවලින් එක් දිනක් තුළ වාර්තා වූ වැඩිම මරණ ඊයේ (1) වාර්තා විය.

ජෝන්ස් හොප්කින්ස් විශ්ව විද්‍යාලය නිකුත් කළ නවතම දත්තවලට අනුව කොරෝනා වයිරසය හේතුවෙන් බදාදා දිනයේදී පමණක් ඇමෙරිකා එක්සත් ජනපදයෙන් වාර්තා වූ මරණ ගණන 884කි. 
 
අද (2) පස්වරුව වනවිට ඇමෙරිකා එක්සත් ජනපදයෙන් වාර්තා වූ සමස්ත මරණ සංඛ්‍යාව 5,000 ඉක්මවූ අතර එරටින් වාර්තා වූ සමස්ත ආසාදිතයන්ගේ ගණන 216,000 ඉක්මවා ගියේය.
 
කොරෝනා වයිරසය හේතුවෙන් ඊයේ (1) පමණක් එක්සත් රාජධානියෙන් වාර්තා වූ සමස්ත මරණ ගණන 563ක් විය. අද (1) පස්වරු 2.30 වනවිට එරටින් වාර්තා වූ සමස්ත මරණ ගණන 2,357ක් දක්වා ඉහළ ගිය අතර එරටින් වාර්තා වූ සමස්ත ආසාදිතයන්ගේ ගණන 29,865ක් විය. 
 
චීනයේ හුබෙයි පළාතේ වූහාන් නගරයෙන් ව්‍යාප්ත වීමට පටන් ගත් නව කොරෝනා වයිරසයෙන් දෙවැනියට වැඩිම බලපෑමක් එල්ල වී ඇත්තේ ස්පාඤ්ඤයට වන අතර කොරෝනා වයිරසය නිසා බදාදා දිනය තුළ එරට සිදු වූ මරණ ගණන 864ක් විය. 
 
කොරෝනා වයිරසය නිසා දිනක් තුළ ස්පාඤ්ඤයෙන් වාර්තා වූ වැඩිම මරණ ගණන එය විය.

කොරෝනා වයිරසය නිසා ස්පාඤ්ඤයෙන් වාර්තා සමස්ත මරණ ගණන අද පස්වරු 2.30වනවිට 9,387ක් දක්වා ඉහළ ගොස් තිබූ අතර එරටින් වාර්තා වූ සමස්ත ආසාදිතයන්ගේ ගණන 104,118ක් ලෙස දැක්විණි.
 
කෝවිඩ්-19 ලෙස නම් කර තිබෙන නව කොරෝනා වයිරසය හේතුවෙන් අද පස්වරු 2.30 වනවිට ලොවපුරා 47,287 දෙනකුට ජීවිත අහිමි වී තිබිණි. ලොවපුරා කොරෝනා ආසාදිතයන්ගේ ගණන 939,436ක් විය. 
 
කොරෝනා වයිරසය ආසාදනය වූ 195,081ක් අද වනවිට සුවය ලබා තිබිණි.
 
ඒ.එෆ්.පී./රොයිටර්ස්
 
055