(එම් .සුසිල් ප්‍රියන්ත)

මේ දිනවල පවතින දැඩි වියළි කාලගුණය හේතුවෙන් තමන්  උග්‍ර ජල හිඟයකට මුහුණදී ඇතැයි කරන්දෙණියේ ජනතාව කියති.

ඇඳිරි නීතිය නිසා සිය දෛනික  ජීවිතයට අවශ්‍ය  වතුර සොයා ගෙන යාමට නොහැකිවීමෙන්  තමන් අන්ත අසරණ තත්වයකය පත්ව ඇති බව ඔවුහු කීහ

තමන් මෙසේ ජල හිඟයෙන් පිඩා විදීමට සිදුව ඇත්තේ ජල නල පද්ධතියක් නැති ලංකාවේ එකම නගරය කරන්දෙනිය නිසා බවද ඔවුහු කියති.

කරන්දෙණියේ  සැම ප්‍රදේශයකම   විශාල ජල හිඟයක් පවතින බවත් ඒ අතරින්  මහගොඩ ,දංගහවිල ,බොරකන්ද ,කිරිපේද්ද ,කොස්වතුමානාන , මඩකුඹුර , දිවියගහවෙල , වැලිවිටියදිවිතුර යන ප්‍රදේශවල ජල හිඟය උග්‍ර වී ඇති බවත් ජනතාව කියති.

නෑමට ,වැසිකිලි කැසිකිලි සඳහා ,රෙදී සේදීමට සහ බීමට වතුර සොයා ගැනීමත් දුෂ්කර කාර්යක් වී තිබෙන බවද  ඔවුහු කියති .

ඇඳිරි නීතිය නොතිබුනේනම් වතුර තිබෙන  ප්‍රදේශ කරා ගොස් සිය ජල අවශ්‍යතා ඉටුකර ගැනීමට තිබූ බවත්  අඩුම තරමින් සිය බල ප්‍රදේශය අවට බල ප්‍රදේශවල ගඟකට , දොලකට හෝ ඇලකට ගොස් දිය නා රෙදි ටිකවත් සොදා ගැනීමට  තිබූ බවත්  ජනතාව කියති .

මින් පෙර කවදාවත්ම තමන්ට මෙවැනි ජල හිඟයකට මුහුණදීමට සිදු නොවූ බව පවසන ඔවුහු මේ වනවිට  තමන් ජල අවශ්‍යතා සපයාගත් ළිං සියල්ල සිදී ගොස් තිබෙන බවද කියති .

කරන්දෙණිය ප්‍රාදේශීය සභාව ජල බවුසරයක් මාර්ගයෙන් ඉතා සීමිත ජලය ප්‍රමාණයක් ලබාදෙන බවත් එසේ දෙන ජලය ඒ අවස්ථාවට පමණක් ප්‍රමානවත් බවද ජනතාව පැවසූහ.

මේ සම්බන්ධයෙන්  කරන්දෙනිය ප්‍රාදේශීය සභාවේ සභාපති ගාමිණි අමරවංශ මහතා මෙසේ පැවසීය.

        ‘‘මේ වගේ ජල හිඟයක් කවදාවත්ම කරන්දෙණියට බලපාලා නැහැ.අපි බෙදල දෙන ජලය දැනට පවතින ජල හිඟයට කිසිසේත්ම  ප්‍රමාණවත් නැති බව ඉතාම පිලිගන්නවා.ඇඳිරි නීතිය අස්සේ අපේ ජනතාවට නාන්න ,රෙදි සෝද ගන්න යන්න බැහැනේ .ඒකත් අපේ අහිංසක ජනතාවට බලපැවා. අපේ නගරය හරහා නළ ජල පද්ධතියකුත් නැ. අපේ ජනතාව ජල හිඟයෙන් පීඩාවට පත්වෙලා ඉන්න එක මුසාවක් නෙමෙයි‘‘.