ඊශ්‍රායල සෞඛ්‍ය අමාත්‍යවරයාට සහ ඔහුගේ බිරිඳට කොරෝනා වයිරසය ආසාදනය වී ඇතැයි ද ඔවුන් ස්වයං-නිරෝධායන ක්‍රියාවලියට යොමු කර ඇතැයි ද එරට සෞඛ්‍ය අමාත්‍යාංශය අද (2) ප්‍රකාශ කළේය.

71 හැවිරිදි වියේ පසුවන යාකෝව් ලිට්ස්මන්, ඊශ්‍රායල අග්‍රාමාත්‍ය බෙන්ජමින් නෙදන්යාහුගේ සමීපතමයකු වේ.

 හෙතෙම කොරෝනා වයිරසය සම්බන්ධයෙන් අග්‍රාමාත්‍යවරයාට නිරන්තරයෙන් නවතම තොරතුරු ලබාදුන් අතර වයිරසයයේ ව්‍යාප්තිය පාලනය කිරීම සඳහා ද අග්‍රාමාත්‍යවරයාට උපදෙස් දුන්නේය.


පසුගිය සති කිහිපයේදී සෞඛ්‍ය අමාත්‍යවරයා ප්‍රසිද්ධියේ දක්නට නොලැබුණු අතර ඒ වෙනුවට දිනපතා මාධ්‍ය හමුවලට එක්වූයේ ඊශ්‍රායල සෞඛ්‍ය අමාත්‍යාංශයේ අධ්‍යක්ෂ ජෙනරාල්වරයා ය.


සෞඛ්‍ය අමාත්‍යවරයා සහ ඔහුගේ බිරිඳ යහපත් සෞඛ්‍ය තත්ත්වයෙන් පසුවන බව ද ඊශ්‍රායල සෞඛ්‍ය අමාත්‍යාංශය නිකුත් කළ නිවේදනයේ දැක්විණි.
ඊශ්‍රායල අග්‍රාමාත්‍යවරයා සඳුඳා වෛද්‍ය පරීක්ෂණයකට යොමු කර තිබූ අතර ඔහුට වයිරසය ආසාදනය වී නැතැයි එහිදි අනාවරණය විය. කෙසේ නමුත් පාර්ලිමේන්තුවේ සහායකුට වයිරසය ආසාදනය වී ඇතැයි වාර්තා විය.




ඒ.එෆ්.පී./ ද ගාඩියන්

055