ජී.ඩබ්ලිව්.කේ.ප්‍රේමතිලක ද සිල්වා

ශ්‍රී ලංකා පොදුජන පෙරමුණේ මන්ත්‍රීවරයෙක් සිය අදහස් දැක්වීමේදී තමාට මෝඩයා යැයි ඇමතීම වහාම ඉල්ලා අස්කර ගන්නා ලෙස ඉල්ලමින් ඉමදුව ප්‍රාදේශීය සභාවේ එක්සත් ජාතික නිදහස් පෙරමුණේ (එජානිපෙ) මන්ත්‍රී ඒ.ජී අරුණ මහතා සභාවේ රැස්වීම් මේසය මත නැටී සිටිමින් විරෝධය පල කිරීම නිසා අද ( 05) දින පැවති ඉමදුව ප්‍රා දේශීය සභා රැස්වීම තුල උණුසුම් ස්වරූපයක් ඇතිවිය.

ඉමදුව ප්‍රාදේශීය සභා සභාපති ඒ.වී. සරත් කුමාර මහතාගේ ප්‍රධානත්වයෙන් ඉමදුව ප්‍රා දේශීය සභා ශ්‍රවනාගාරයේ දී පැවැත්විණි.

ඉමදුව ප්‍රාදේශීය සභා රැස්වීම පැවැත්වෙන අතර තුර අදහස් ප්‍රකාශ කිරීමේ දී පොදුජන පෙරමුණේ ප්‍රා දේශීය සභා මන්ත්‍රී අමරසේන ලියනපතිරණ මහතා මෙසේ තමන්ට මෝඩයා ලෙස ආමන්ත්‍රනය කල බවත් , දළු අදින මන්ත්‍රී මෝඩයා ලෙස තමන්ට අපහාස කර බවත් වහාම එම ප්‍රකාශය ඉල්ලා අස්කර යුතු බවත් පවසමින් මෙසේ රැස්වීම් මේසය උඩ නඟිමින් ඒ.ජී.අරුණ මන්ත්‍රීවරයා සිය විරෝධය ප්‍රකාශ කලේය.

කෙසේ නමුත් පොදුජන පෙරමුණ මන්ත්‍රී අමරසේන ලියනපතිරණ මහතා එම ප්‍රකාශය ඉල්ලා අස්කර ගැනීමට එකඟ නොවීම නිසා සභාව තුල ඇතිවූයේ දැඩි උණුසුම් තත්වයකි.

පසුව ඉමදුව ප්‍රාදේශීය සභාවේ සභාපති ඒ.වී.සරත් කුමාර මහතා අරුණ මන්ත්‍රීවරයා රැස්වීම් මේසයෙන් බැස්සවීම සදහා කිහිප විටක්ම උත්සාහ කරද එම තත්වය අසාර්ථක විය.

කෙසේ නමුත් පසුව ඉමදුව ප්‍රා දේශීය සභාවේ සභාපති ඒ.වී සරත් කුමාර මහතා සභාවේ මූලාසනයේ සිටිය දීම ඉමදුව ප්‍රා දේශීය සභාවේ උප සභාපති ජේ.කේ.ඩී. ජයවික්‍රම මහතා (ශ්‍රීලංපොජපෙ) මැදිහත් වී අමරසේන ලියනපතිරණ මන්ත්‍රීවරය වෙනුවෙන් තමා සමාව ඉල්ලා සිටින බවත් එම නිසා රැස්වීම් මේසයෙන් බැස සභාව පවත්වාගෙන යාමට සහය දෙන මෙන් ඉල්ලා සිටි අතර පසුව ඒ.ජී අරුණ මන්ත්‍රීවරයා රැස්වීමේ මේසයෙන් බැස සිය විරෝධතාවය අවසන් කරන ලදී.