ඉන්දියාවේ 93 හැවිරිදි පුද්ගලයෙකු කොරෝනා වයිරසය ආසාදනය වීමෙන් පසු සුවය ලබා ඇතැයි එරට වෛද්‍යවරු පවසති.

ඔහු ඉන්දියාව් මෙතෙක් සුවය ලැබූ වයස්ගතම පුද්ගයා වන අතර ඔහුට දියවැඩියාව හා අධි රුධිර පීඩනය යන රෝග ද තිබී ඇත.

වෙනත් රෝග සහිත හා වයස්ගත පුද්ගලයන්ට කොරෝනා වයිරසය මාරාන්තික වන බව ලොව පුරා සිද්ධීන් අධ්‍යයනයේදී ඔප්පු වී ඇති බැවින් මෙවන් වයස්ගත පුද්ගලයෙකු සුවය ලැබීම පුදුමයට කරුණක් බව මාධ්‍ය වාර්තා කර ඇත.

මෙම පුද්ගලයා සමඟ ඔහුගේ බිරිඳ ද කොරොනා වෛරස ආසාදනයට ලක්ව ඇති අතර දෙදෙනාම මේ වනවිට සුවය ලබා ඇති බවත් තවත් දින කිහිපයකින් රෝහලෙන් මුදා හැරීමට හැකිවනු ඇති බවත් රෝහල් බලධාරීහු පවසති.

දකුණු කේරළ ප්‍රාන්තයේ ජීවත්වන මෙම යුවල ආසාදනයට ලක්ව ඇත්තේ ඉතාලියේ සිටි දියණිය හා බෑණා නිවසට පැමිණීමෙන් පසුව ය.

සති තුනකට පෙර ඔවුන් දෙදෙනා රෝහල් ගතකළ අවස්ථාවේ වෙන්වීමට සිදුවීම හේතුවෙන් නොසන්සුන්ව සිටි බව කොට්ටායම් ශික්ෂණ රෝහලේදී මෙම යුවලට ප්‍රතිකාර කළ වෛද්‍ය ආර්.පී. රෙන්ජින් පවසයි.

පසුව ඔවුන් දෙදෙනා වීදුරු කොටසකින් වෙන්කර ඇති එකලඟ පිහිටි කාමර දෙකකට දැමූ විට සතුටට පත්වූ බවත් වෛද්‍යවරයා පවසයි.

රෝහල් කාර්යමණ්ඩලයේ සියලුදෙනාගේ ආදරය හා සෙනෙහස දිනා ගැනීමට මෙම යුවළ සමත් වී තිබේ.

එම යුවළ සුවපත් වීම ඉන්දියාවේ මාධ්‍ය වල ප්‍රධාන පුවතක් බවට පත්වුණු අතර ප්‍රතිකාර කළ වෛද්‍යවරුන් ද පැසසුමට ලක්වී තිබේ.

"ඉතාලි යුවල" ලෙස නම්කරනු ලැබූ දියණිය හා බෑණා ප්‍රදේශයෙන් සැඟව ගොස් සිටි නමුත් පසුව නිලධාරීන් විසින් සොයාගෙන තිබේ. 

කෙසේවුවද ඒ වනවිට එම පවුලේ තවත් සාමාජිකයින් කිහිපදෙනකුට ද වයිරසය ආසාදනය වී තිබුණු බව කේරළ බලධාරීහු පවසති.

ඉන්දියාවේ මේ වනවිට කොරෝනා වයිරස ආසාදිතයින් 1725 ක් වාර්තා වී ඇති අතර 54 දෙනකු මියගොස් තිබේ.

රෝගීන් 158 දෙනකු සුවය ලබා ඇත.

(බීබීසී ඇසුරිණි - 085)