ඇමෙරිකා එක්සත් ජනපදයෙන් දිනක් ඇතුළත වාර්තා වූ වැඩිම නව කොරෝනා වයිරස ආසාදිතයන්ගේ ගණන සිකුරාදා වාර්තා වූ අතර එම ගණන 40,870ක් විය.

ඒ අනුව ඇමෙරිකා එක්සත් ජනපදයෙන් වාර්තා වන නව කොරෝනා වයිරස ආසාදිතයන්ගේ සමස්ත ගණන මිලියන 2.475ක් දක්වා ඉහළ ගියේය .

ඇමෙරිකා එක්සත් ජනපදයේ ප්‍රාන්ත ගණනාවකින් දෛනිකව වාර්තා වන නව කොරෝනා වයිරස ආසාදිතයන්ගේ ගණන ඉහළ යමින් තිබෙන අතර මේ තත්ත්වයත් සමඟ එරට කොරෝනා වයිරස කාර්ය සාධක බලකායේ රැස්වීමක් ද කැඳවා ඇත. නව කොරෝනා වයිරසය හෙවත් 'කොවිඩ්-19' ගෝලීය වසංගතය මර්දනය කිරීම සඳහා ස්ථාපිත කළ එම කාර්ය සාධක බලකාය මාස දෙකකින් රැස්වී නැත.

"මේ වෙද්දි රට ලොකු ප්‍රශ්නයකට මුහුණ දීලා ඉන්නේ " යැයි ඇමෙරිකාවේ බෝ වන රෝග පිළිබඳ ඉහළම විශේෂඥයා වන වෛද්‍ය ඇන්තනි ෆවුචි පැවැසීය.

"රට ලොකු ප්‍රශ්නයක ඉන්නේ , අපි හැමෝටම වගකීමක් තියෙනවා , ඒ වගේම අනෙක් අය ගැනත් අපට වගකීමක් තියෙනවා. ඒක නිසා ජනතාව මේක හොඳින් සිහි තබාගන්න ඕනෑ. ඔබට තියෙන අවදානම ඔබ විතරක් නෙවෙයි හුදෙකලා වෙන්නේ" යැයි හෙතෙම කීය.

අල්ජසීරා/රොයිටර්ස්
055