(ජේ.කේ.එල් චාමින්ද)

කෙරෝනා වයිරසය ආසාදනය වී ඇති  බවට සැකසහිත රෝගීන්   හමුවුවහොත් ඔවුන් තාවකාලිකව ඇඳවීම සඳහා දකුණු පළාතේ ප්‍රාදේශීය රෝහල් 8කට අවශ්‍ය  යටිතල පහසුකම්  සකස් කරගැනීම සඳහා ප්‍රතිපාදන ලබාදී ඇති බැව් දකුණු පළාත් ආණ්ඩුකාර ආචාර්ය විලිගමගේ මහතා පවසයි.
 
දකුණු පළාත් ප්‍රධාන ලේකම්වරයා මගින් පළාත් සෞඛ්‍ය අධ්‍යක්ෂකවරයා වෙත එම ප්‍රතිපාදන ලබාදී ඇති බවද ආණ්ඩුකාරවරයා සදහන් කළේය. මේ පිළිබද අදහස් දක්වමින් දකුණු පළාත් ආණ්ඩුකාරවරයා මෙසේද කිවේය.
 
 'දැනට කොරෝනා බවට සැකසහිත රෝගීන් සඳහා  කරාපිටිය හම්බන්තොට යන රෝහලවල තමයි විශේෂිත වාට්ටු තියෙන්නේ. ඒ අතරතුර පළාතේ වෙනත් ස්ථානයකින්  රොගියෙක් නිශ්චය කරගතහොත් සැක සහිත රෝගියෙක් හමුවුවහොත්  එම රෝගීන් තාවකාලිකව රඳවන්න ප්‍රදේශීය රෝහල් 08ක අවශ්‍ය පහසුකම්  සකස් කරගැනීමට ප්‍රතිපාදන ලබාදී තියෙනවා. මේ දක්වා දකුණු පළාතේ රෝහල්වලට අවශ්‍ය සියලු පහසුකම් ලබාදී තියෙනවා.
 
දකුණු පළාතෙන්ම විදේශිය ජාතිකයා හැරුණු විට එක  ආසාදිත රෝගියෙක් පමණයි හමුවෙලා තියෙන්නේ. ආරම්භයේ සිටි කොරෝනා බවට සැකකරන රෝගීන් 150ක් කරාපිටියේ හා හම්බන්තොට රෝහල්වල ප්‍රතිකාර ලැබුවා. ඒ කිසිම අයෙකුට කොරෝනා වයිරසය වැළදි ඇති බවට තහවුරුවෙලා නැහැ. දකුණු පළාත තුළ කොරෝනා වයිරසය පැතිරීම පාලනයට  අපි සියලු ක්‍රියා මාර්ග අරගෙන තියෙනවා. මෙම තත්වය තවදුරටත් ආරක්ෂා කරගතයුතු වෙනවා. පළාතේ දිසාපතිවරු තිදෙනා ආරක්ෂක ප්‍රධානින්, පළාත් අමාත්‍යංශවල ලේකම්වරු  කොමසාරිස්වරුන්ගේ  සහභාගිත්වයෙන්   මේ සඳහා සම්බන්ධීකරණයක් කරලා තියෙනවා. අපි රැස්වෙලා විවිධ තීරණ ගත්තා. එම තීන්දු තමයි ක්‍රියාත්මක කරන්නේ. ඇඳිරි නීතිය අවසන්වීමෙන් පසු සතොසට අමතරව සමුපාකාර මගින්ද භාණ්ඩ බෙදාහැරීමට  කටයුතු කරනවා. ගැස් එම සමාගම්වල එජන්තවරුන් මගින් නිවසට ගෙනවිත් දීමේ වැඩපිළිවෙළක් සකස් කොට තියෙනවා' යැයිද ආණ්ඩුකාරවරයා සදහන් කළේය.