(නිමන්ති රණසිංහ)

කොරෝනා රෝගය වසන් කරමින් මහරගම අපේක්ෂා රෝහලේ බාහිර රෝගී අංශයෙන් බෙහෙත් ලබා ගැනීමට පැමිණී පුද්ගලයකු හේතුවෙන් එම රෝහලේ වෛද්‍යවරු ඇතුලු කාර්ය මණ්ඩල සාමාජිකයින් 15 දෙනෙකු වයික්කාල නිරෝධායන මධ්‍යස්ථානය වෙත යොමු කළ බව රෝහල් අධ්‍යක්ෂ වෛද්‍ය වසන්ත දිසානායක මහතා අද (06) පැවසීය.

ඉකුත් 03 වැනිදා සවස කොළඹ ඔරුගොඩවත්ත ප‍්‍රදේශයේ සිට පැමිණ සිටි මෙම පුද්ගලයා ප‍්‍රතිකාර ලබා ගැනීම සඳහා බාහිර රෝගී අංශය වෙත පැමිණ තිබූ බවත් ඔහු තමන්ට කොරෝනා වයිරසය ආසාදනය වී ඇති බවට දැන දැනම ප‍්‍රතිකාර ලබා ගැනීමට පැමිණ තිබූ බවත් මහරගම අපේක්ෂා රෝහලේ අධ්‍යක්ෂවරයා ප‍්‍රකාශ කළේය.

මෙම තැනැත්තාට බෙහෙත් ලබාදුන් වෛද්‍යවරයා ඇතුලූ කාර්ය මණ්ඩලයේ සාමාජිකයින් 15 දෙනෙකු හදුනා ගැනීමෙන් පසු ඔවුන් නිරෝධායනය සඳහා වයික්කාල නිරෝධායන මධ්‍යස්ථානය වෙත අද (06) පෙරවරුවේ පිටපත් කර යැවූ බවද වෛද්‍ය දිසානායක මහතා සඳහන් කළේය.

එසේම, රෝගය අසාදනය වූ පුද්ගලයා හෝමාගම මූලික රෝහලේ කොරෝනා ඒකකය වෙත යොමු කළ බවත්, මේ වන විට අපේක්ෂා රෝහලේ ප‍්‍රතිකාර සේවා සමාන්‍ය පරිදි සිදුවන බවද රෝහල් අධ්‍යක්ෂවරයා වැඩිදුරටත් ප‍්‍රකාශ කළේය.