(මීරිගම පුෂ්පකුමාර මල්ලවආරච්චි)

ගම්පහ දිස්ත්‍රික් මැතිවරණ අපේක්ෂකයෙකුගේ  ආධාරකරුවන් පිරිසක් ගමන් ගත් ඩිපෙන්ඩර්  රියක යතුරු පැදියක් ගැටීමෙන් යතුරු පැදියේ ගමන් ගත් යුවලක් බරපතල තුවාල සහිතව මීරිගම රෝහලට ඇතුළත් කර ඇතැයි මිරිගම පොලිසිය කියයි .

අද (05) පස්වරු  6.30ට පමණ මීරිගම වේවැල්දෙණිය මාර්ගයේ බණ්ඩාරනායක විදුහල ආසන්නයේ දී සිදු වූ මෙම අනතුරින් තුවාල ලබා ඇත්තේ මැතිවරණ රාජකාරි සඳහා  ගිය රජයේ නිලධාරිනියක හා ඇගේ සැමියා බව ⁣පොලිසිය කියයි.

මීරිගම රේන්දපොල ප්‍රදේශයේ පදිංචි මෙම කාන්තාව සිය මැතිවරණ රාජකාරි අවසන් කිරීමෙන් පසු සැමියා සමග යතුරුපැදියේ ගමන් කරමින් සිටිය දී මෙම අනතුරට මුහුණ පා ඇත.

ඩිෆෙන්ඩර් රිය මෝටර් රියකට ඉස්සර කරන අවස්ථාවේ යතුරුපැදිය එහි මුහුණට මුහුණලා ගැටී ඇතැයිද බරපතල තත්ත්වයේ  සිටි යතුරුපැදිකරු සුවසැරිය ගිලන් රිය මගින් රෝහල් ගත කර ඇති අතර කාන්තාව වෙනත් වාහනයකින් රෝහල් ගත කිරීමට ප්‍රදේශවාසීන් පියවර ගෙන තිබුණි .

මීරිගම පොලිස් ස්ථානාධිපති ප්‍රධාන පොලිස් පරීක්ෂක ප්‍රියන්ත මහතාගේ මෙහෙයුම යටතේ පොලිස් නිලධාරීහු පරීක්ෂණ පවත්වති.