වයඹ පළාතේ ප‍්‍රවාහන කටයුතු හා සම්බන්ධ ආයතනයක සේවය කළ එක්දරු පියෙකි. තම බිරියටත් දියණියටත් දැඩි සේ ආදරය කළ ඔහුගේ ලොකුම අඩු පාඩුවක් වූයේ හැම දිනකම සවස මත්වතුර තොල ගාගෙන අවසිහියෙන් ගෙදර ඒමයි. ඒත් ගෙදර ආ විගසම දියණියගේ අධ්‍යාපන කටයුතු සෙවීම ඔහුගේ සිරිත විය.

පසුගියදාත් සවස්වරුවේ ගෙදර ආ සැණින් දියණිය ළඟට ඇද ගත්තේ පොත් ටිකකුත් සමඟ ඉගෙනීම සොයා බැලීමටය. ”අද ටීචර් ෂෝක් පාඩමක් කියල දුන්නා තාත්තේ ඒකට සම්බන්ධ පොටෝ තියෙන පති‍්‍රකාවකුත් දුන්නා” කී දියණිය ඔහු අත තැබුවේ මත් වතුරේ ආදීනව දැක්වෙන සටහනකි. පති‍්‍රකාව ද ඔහු අත තැබුවාය. එය කියවමින් ගෙට ගිය පියා නැවත එළියට ආවේ නැත.

වැඩි කතාබහක් නැතිව පසුවදා වැඩට ගිය ඔහු ආපසු ආවේ පරණ සිරිත අතහැර දමාලූ.

මෙම සටහන සහ පති‍්‍රකාව ගුරුතුමියගේ එකක් නොව අම්මා සහ දුව එක්වී සකස්කළ එකක් බව ඔහු තවමත් දන්නේ නැතිලූ.