අගනුවර බැංකු රැකියාවකට ගිය ලොකු පුතා මාතර පිහිටි සිය නිවසට ආවේ මාස ගණනකට පසුවය. උදේ පාන්දර පත්තරකාරයා යන මොහොතේ අක්කාගේ පොඩි දුව ‘විජය’ පත්තරයක් අරගෙන දෙන්නැයි කියනවා ඔහුට ඇසිණි. ගෙදර අයගේ අවධානයක් නොවුවත් ළිඳ ළඟ රැවුල බාමින් සිටි ඔහු පියාට කීවේ මේසය මත ඇති තම පොකැට්ටුවෙන් මුදල් ගෙන ඇයට පත්තරයක් මිලදී ගෙන දෙන ලෙසය. මුදල් ගැනීමට පොකැට්ටුව විවෘත කළ පියාට දෙවියන් සිහිවූයේ එහි ප්ලාස්ටික් වැස්ම තුළ රූමත් කාන්තාවකගේ සිනාමුසු  පින්තූරයක් වීම නිසාය. මිනිබිරියට මුදල් දෙන ගමන් ඔහු තම බිරියට අඬගසා මේ රූපය පෙන්වා ‘‘හෙමිජ්ජ වගේ හිටියට ලොකු පුතත් එක්කෙනෙක් තෝරගෙන’’ කීවේ සිනා සෙමිනි. පින්තූරයට එබී බැලූ බිරියට හිනා ගියේ මේ ලොකු පුතා පි‍්‍රයකරන ටෙලිනාට්‍ය නිළියකගේ පිංතූරයක් හෙයිනි. ඒත් මේ කතාව මවගෙන් පුතාටත් පුතාගෙන් කාර්යාල මිතුරන්ටත් යාම නිසා දැන් පියාට නිකම් මොකද්ද වගේ ලූ.