හිතවතෙකුගෙන් ලද උපදෙස් මත අස්වැන්න වැඩිකර ගන්නට පොල් ගස් වටේට ගිණි තැබූ කාන්තාවකට තම ගෙවත්තේ ඵල දරමින් තිබූ පොල් ගස් හත අටක් අහිමි කර ගන්නට සිදුවීමේ පුවතක් ලංකාදීපයට වාර්තාවේ. සිද්ධිය මෙසේය. ඇය රජයේ ආයතනයක සුළු රැකියාවක නිරතවූ තැනැත්තියකි. තම ගෙවත්තේ වූ පොල් ගස්වලින් සරු අස්වැන්නක් නොලැබීම නිසා පසුවූයේ දැඩි කනස්සල්ලෙනි.

පසුගිය දිනෙක ඇගේ ආයතනයේ වැඩිහිටියෙක් පොල් අස්වැන්න වැඩි කරගන්නට අපූරු උපදෙසක් දුන්නේය. පොල් ගස වටේට කොළ රොඩු ටිකක් දමා දුම් ගස්සවන්නැයි උපදෙසින් කියවිණි. නිවාඩු දිනයක් බලා ඇය වැඩිහිටියාගේ උපදෙස් අකුරටම ක්‍රියාවට නැංවූයේ සිය සැමියාගේ විරෝධතාවද මායිම් නොකරමිනි. වත්ත පුරා තිබූ කොළ රොඩු පමණක් නොව දර කොට කීපයක්ද පොල් ගස්වටා ගොඩ ගැසූ ඇය ඒවාට ගිනි තබා සතුටින් බලා සිටියේ එළඹෙන කන්නයේ පොල් අස්වැන්න පිළිබඳ හීන දකිමිනි. දින කිහිපයක් ගතවෙද්දී ඇගේ වත්තේ පොල් ගස් හත අටකම කරටි කඩා වැටී ඉහළ සිට පහළට මැරීගෙන එන්නට පටන්ගෙන ඇත්තේ ඇගේ හීන බොඳ කරමිනි. කෙසේ වෙතත් දැන් සිද්ධිය ආයතනයේ පිරිසක්ද දැනගෙන ඇති අතර උපදෙස් දුන් වැඩිහිටියාට ලුණු ඇඹුල් ඇතිව ඇයගෙන් ප්‍රසංසාවක් ලැබුණු බවද එහි සෙසු සේවක සේවිකාවෝ පවසති.

(වියලුව වාර්තාකරු)