අයියගේ කලිසමේ සාක්කුවේ තිබූ ගංජා මිටියක් නිසා සිර දඬුවම් විඳීමට සිදුවූ සහෝදරයකු පිළිබඳ පුවතක් ගාලු දිසාවෙන් වාර්තා වේ.
 මොහු ගමෙන් පිට රැකියාවක් කරන අයෙකි. නිවාඩුවට ගමට පැමිණීම සිරිතකි. දිනක් නිවාඩුවට ගෙදර පැමිණි විටදී හදිසි ගමනක් යෑමට වුවමනා විය. එහෙත් ඒ වන විට මොහුගේ කලිසම් සියල්ලම සෝදා තිබූ හෙයින් ඇඳගෙන යෑමට එකක් නොවීය. ගමන ද කල් තැබීමට බැරි එකකි.

 අයියා ගමනක් ගොස් ඇවිත් ගලවා ඇඳුම් රාක්කයේ තිබූ ඩෙනිම් කලිසම ඇඳගත් මොහු අයියාගේ මෝටර් බයිසිකලයෙන්ම ගමන යෑමට පිටත් විය.

 අතරමග දී පොලිසියේ රථවාහන අංශයේ නිලධාරි පිරිසක් මොහු පදවාගෙන ගිය මෝටර් බයිසිකලය නතර කර පරික්ෂා කළේය.

යතුරුපැදියේ ලියාපදිංචි බලපත්‍ර මෙන්ම මොහුට යතුරුපැදි පැදවීමට අවශ්‍ය රියැදුරු බලපත්‍රය ද ඒ මොහොතේ නොවීය.

 මොහු යන ගමන ගැන සත්‍ය ප්‍රකාශ කළත් පොලිස් නිලධාරීහු ඒ කිසිවක් පිළිනොගත්හ. කලිසමේ සහ කමිසයේ සාක්කු පරික්ෂා කිරීමට සූදානම් විය. සාක්කුවේ තිබූ ගංජා මිටියක් පොලිසියට අසු විය. ගංජා මිටිය තමාට ලැබුණේ කෙසේදැයි විමසූ විට ඒ මොහොතේ ද මෙම කලිසම අයියගේ එකක් බවත් තමා ඒ ගැන කිසිවක් නොදන්නා බවත් සත්‍ය ප්‍රකාශ කළ ද ඒ සියල්ලම ගොතන ලද බොරුවක් යැයි පොලිස් නිලධාරීහු විශ්වාස කළහ.

අත්අඩංගුවට ගත් මොහු අධිකරණයට ඉදිරිපත් කෙරුණි. දඩ මුදලට අමතරව ගංජා මිටියක් ළඟ තබා ගෙන සිටීම නිසා දින දාහතරක් රක්ෂිත බන්ධනාගාරයේ සිටීමට ද සිදුවිය.
(බළපිටියේ එස්.ඒ.වයි. ද සිල්වා)