(ජේ.කේ.එල් චාමින්ද)

කොග්ගල නිදහස් වෙළඳ කලාපයෙන් කොරෝනා ආසාදිතයින් 54 දෙනෙකු  දින 06ක කාලයක් තුළ වාර්තා වී ඇති බවත් මෙම තත්වයත්  සමග කොග්ගල වෙළඳ කලාපයේ පිහිටි අනිකුත් ඇඟලුම් කම්හල්වල සේවක සේවිකාවන් වෙතද කොරෝනා වසංගතය පැතිරීයාමේ අවදානමක් ඇති බැව් හබරාදුව සෞඛ්‍ය වෛද්‍ය නිලධාරි වෛද්‍ය ප්‍රමෝද සිරිවර්ධන මහතා පවසයි.

අද (16) වන විට කොග්ගල නිදහස් වෙළඳ කලාපයේ ඇඟලුම් කම්හල්  03කින් ඇඟලුම් සේවක සේවිකාවන් 54 දෙනෙකු වාර්තා වී ඇති බවද ප්‍රාදේශීය සෞඛ්‍ය වෛද්‍ය නිලධාරිවරයා සඳහන් කළේය.

ඉකුත් 10 වැනි දින එක් ඇඟලුම් කම්හලක සේවකයෙකුට හා  සේවිකාවකට කොරෝනා වයිරසය ආසාදනය වී  ඇති බවට මුලින්ම තහවුරු විය. මේ වනවිට මෙකී වසංගත තත්වය ඇඟලුම් කම්හල් 03ක් පුරා පැතිරී ගොස් ඇති බවද හබරාදුව සෞඛ්‍ය වෛද්‍ය නිලධාරිවරයා පවසයි.

එක් ඇඟලුම් කම්හලකින් ආසාදිතයින් 34 දෙනෙකු වාර්තා වී ඇති  අතර තවත් ඇඟලුම් කම්හලින් ආසාදිතයින් 18 දෙනෙකු වාර්තා වී තිබේ. අනින් ඇඟලුම් කම්හලින් කොරෝනා ආසාදිතයින් දෙදෙනකු වාර්තා වී ඇත.

මෙකී අවදානම් තත්වය පිළිබඳ තමන් ගාල්ල දිස්ත්‍රික් සෞඛ්‍ය  සේවා අධ්‍යක්ෂකවරයා දැනුවත් කිරීමට කටයුතු කර ඇති බවද  හබරාදුව සෞඛ්‍ය වෛද්‍ය නිලධාරිවරයා පවසයි.