නිදහසින් පසු මේ රටේ හටගත් දරුණුම දේශපාලන කුණාටුව දැන් හමාරය. පසුගිය ඉරිදා (16) පෙරවරුවේ රනිල් වික්‍රමසිංහ මහතා පස්වැනි වරටත් අග්‍රාමාත්‍යවරයා වශයෙන් දිවුරුම් දීම එහි අවසානය යැයි අපි සලකමු. වෙනදා මෙන් මාධ්‍යයට විවෘත නොවූ දිවුරුම් දීමේ උත්සවයෙන් පසුව අරලියගහ මන්දිරයට පැමිණි අග්‍රාමාත්‍යවරයා එහිදී ජාතිය අමතා විශේෂ ප්‍රකාශයක් කරමින් රටේ ප්‍රජාතන්ත්‍රවාදය රැකගැනීම වෙනුවෙන් සියලු‍ වෙනස්කම් ඉවත දමා එකට සටන් කළ සියලු‍ දෙනාට තුති පුදකළේය. මෙතැනින් ලබාගත් ජයග්‍රහණය ශ්‍රී ලංකාව සෞභාග්‍යවත් සමගියෙන් ජීවත් වන රටක් බවට පත්කිරීමට යොදවාගන්නා බව ද වික්‍රමසිංහ මහතාගේ ප්‍රකාශයේ සඳහන් විය.

රටේ ජනාධිපතිවරයා වශයෙන් තමන් ඔක්තෝබර් 26 වැනිදා සිට ගනු ලැබූ සියලු‍ තීන්දු තීරණ සද්භාවයෙන් යුතු නීති විශාරදයන්ගේ උපදෙස් මත ගත් බව මෛත්‍රීපාල සිරිසේන මහතා දිවුරුම් දීම සිදුවූ අවස්ථාවේ කළ ප්‍රකාශයේ සඳහන් විය. රනිල් වික්‍රමසිංහ මහතා සම්බන්ධයෙන් තමන් දැරූ පෞද්ගලික මතයේ කිසිදු වෙනසක් නැති බව ද සඳහන් කළ ජනාධිපතිවරයා රටට බරපතළ ආර්ථික විනාශයක් කළ බැඳුම්කර වංචාව ඇතුළු තවත් බොහෝ කාරණා සම්බන්ධයෙන් වසර තුනක් පැවැති රජයට දොස් පැවැරුවේය.

මෙතෙක් පැවැති දේශපාලන අර්බුදයේ නිමාව එසේ සටහන් වුවද එම විසඳුම යථාර්ථයක් බවට පත්කර ගතහැක්කේ විධායකය නියෝජනය කරන ජනාධිපතිවරයාත් ව්‍යවස්ථාදායකය නියෝජනය කරන අගමැති ඇතුළු ආණ්ඩුවත් ගැටුමකින් තොරව ඉදිරියට යාමෙන් පමණි. දවස් 52ක් රට තුළ තිබුණේ අරාජික තත්ත්වයකි. එය නාමිකව හෝ වැළකී ගොස් තිබුණේ ජනාධිපතිවරයා රටේ නායකයා වශයෙන් කටයුතු කිරීම හේතුවෙනි. මෙය පැහැදිලිව පෙන්නුම් කරන්නේ විධායක ජනාධිපතිවරයකු සිටින රටක් පාලනය වන්නේ අගමැතිවරයා ඇතුළු ඇමැති මණ්ඩලය සහ ජනාධිපතිවරයා අතර සබැඳියාව යහපත්ව පවතින තරමට බවයි. මේ දෙපාර්ශ්වය අතර අන්‍යොන්‍ය විශ්වාසය සහ බැඳීම ගිලිහී යනවිට පාලනය පීලි පනියි. පීල්ල පැන්නාට පසුව එවැනි ආණ්ඩුවකට යළි පීලිගත කිරීම කොතරම් අමාරුදැයි දැනගැනීමට ගෙවීගිය සති කිහිපය හොඳටම ප්‍රමාණවත්ය. මේ නිසා දැන් මේ දෙපාර්ශවයම කළ යුත්තේ වාදභේද, පෞද්ගලික මතිමතාන්තර අවසන් කොට තමන්ට බලය පවරා දී ඇති මහජනතාවගේ සුබසිද්ධිය වෙනුවෙන් කටයුතු කිරීමයි. සියලු‍ මතගැටුම්, සිත් අමනාපකම්, ප්‍රතිපත්තිමය වෙනස්කම් ජනතාවගේ අභිවෘද්ධිය වෙනුවෙන් පසෙකට දැමීම ඒ සඳහා අවශ්‍ය බවත් පෙන්වාදීමට කැමැත්තෙමු.

රටට දැන් අවශ්‍ය වන්නේ අලු‍ත් ප්‍රවේශයකි. එම අලු‍ත් ප්‍රවේශය තුළ වසර තුනක් පැවැති ආණ්ඩුවේ ක්‍රියාකලාපයට ඉඩක් නැති බව රජය තේරුම් ගැනීම අවශ්‍යය. තනතුරු බෙදාගැනීම්වලට මුල් තැනක් ලබාදෙමින් ජනතාවගේ ප්‍රශ්න යටපත් කිරීමට කටයුතු කිරීමෙන් වළකින බව මුල් පියවරේදීම පෙන්වා දීමත් අවශ්‍යය. පසුගිය සති කිහිපය තුළදී එ.ජා.පෙ. නායකයන් ජනතාවට පෙන්වා දී තිබූ ප්‍රජාතන්ත්‍රවාදය වෙනුවෙන් කැපවීමේ පිළිවෙත ඉදිරියට ද ගෙන යායුතුය. ආණ්ඩුවක් වශයෙන් ගන්නා තීන්දු, තීරණ ජනතාවට හොරෙන් ගැනීමේ පිළිවෙතින් බැහැරවීම අවශ්‍යය. 

දේශපාලන අර්බුදය අවසන් වුවද රටේ දිගින් දිගටම පවතින අර්ථික අර්බුදය එලෙසම පවතී. ඇත්ත වශයෙන්ම දැන් පවතින්නේ වඩාත් බැරෑරුම් තත්ත්වයකි. එහෙත් අඩු තරමින් රටේ මුදල් පාලනයට වගකියන පාර්ලිමේන්තුව දැන් සක්‍රීයව පවතී. ඒ තුළ මුදල් කටයුතු මෙහෙය වන ආකාරය සම්බන්ධයෙන් රටේ ප්‍රධාන විපක්ෂයට ද පැවැරෙන්නේ විශාල වගකීමකි. සක්‍රීය විපක්ෂයක් යනු පාර්ලිමේන්තු ප්‍රජාතන්ත්‍රවාදය සවිබලගන්වන පාර්ශ්වයකි. එහෙත් ආණ්ඩුව ගෙන එන හැම පනතකටම අහේතුකව විරුද්ධ වෙමින් කථානායකවරයාගේ නියෝග ගණන් නොගෙන හිතුමතයේ කටයුතු කිරීමට සූදානම් වුවොත් එයින් රටට සිදුකරන්නේ බලවත් හානියකි. ආණ්ඩුවේ වැරැදි, ප්‍රජාතන්ත්‍රවිරෝධී ක්‍රියාවලට එකහෙළා විරුද්ධ වීම විපක්ෂයේ වගකීම වුවත් ආණ්ඩුවේ හැම අදහසකටම විරෝධය පෑම යහපත් ලක්ෂණයක් නොවේ. නැත්නම් සිදුවන්නේ ආණ්ඩුව වැරැදි පාරක යනවිට විපක්ෂය ද පාරෙන් ඉවතට පැනීමය. 

එජාපය ප්‍රමුඛ රජයට ද මෙහිදී පැවැරෙන්නේ විශාල වගකීමකි. රටේ නීතියේ පාලනය පවත්වාගෙන යාමත්, වංචා සහ දූෂණවලට එරෙහිව කටයුතු කිරීමත් මෙහිදී වැදගත් වෙයි. විශේෂයෙන්ම අගමැති දිවුරුම් දීමේ උත්සවයේ දී ජනාධිපතිවරයා විසින් නඟන ලද චෝදනා නිකම් පැත්තකට නොදැමිය යුතුය. එ.ජා.පෙ. රජයට එරෙහිව පසුගිය වසර තුනහමාරක කාලය තුළ දී බරපතළ චෝදනා එල්ල වූ බව ද අමතක නොකළ යුතුය. අකාර්යක්ෂම, අපැහැදිලි, ජනතාවට එරෙහිව යන තීන්දු තීරණ ගැනීමේ ක්‍රමවේදය රටේ ජනතාවගේ විරෝධයට ලක්වූ බවත් නීතිමය රාමුවක් තුළ විනිවිදභාවයෙන් යුතුව කාර්යක්ෂමව සිදුකෙරෙන ප්‍රතිපත්තිමය තීන්දු ගැනීම් ජනතාවගේ අපේක්ෂාව බවත් තේරුම් ගැනීම අවශ්‍යය. ජනතාවට හොරෙන් ගසන ගිවිසුම් දොරගුලුලාගෙන සිදුකෙරෙන ටෙන්ඩර් ගනුදෙනු, ඩීල් දැමීම්, ආයෝජකයන් ආපසු හරවා යැවීම් වැනි දේ යළි සිදුවනු දැකීමට ප්‍රජාතන්ත්‍රවාදය වෙනුවෙන් සටන්කොට ආණ්ඩුව ප්‍රතිස්ථාපනය කිරීමට සියලු‍ වැර යොදා සටන් කළ ජනතාව කැමැති නොවනු ඇත. 

එජාපෙ ආණ්ඩුවට වැඩ කිරීමට ඉතිරිව ඇත්තේ සුළු කාලසීමාවකි. එම කාලය තුළ දී තමන් නිවැරැදි වීමට කැමැති බව ජනතාව තුළ අදහසක් ඇති කිරීමට සමත් පාලනයක් ගෙනගියොත් ආණ්ඩුවට ගොඩ යා හැකිවනු ඇත. එසේ නැතුව ඉදිරියෙන් “බුදු සරණයි” බෝඩ් ගසාගෙන ඇතුළේ හොර හරක් පටවාගෙන යන ලොරියක ආකාරයෙන් වැඩ කළොත් එය ජනතාව නොඉවසනු ඇත. ජනතාව වෙනදාට වඩා සෝදිසියෙන් තමන් දෙස බලා සිටින බව රජය දැන සිටීම අවශ්‍යය.