වසර 1994දී  බංගලාදේශයේ අගමැතිනී ෂෙයික් හසීනා ඝාතනය කිරීමට තැත්කිරීමට එරෙහිව එරට අධිකරණය විසින් ප්‍රධාන විපක්ෂය වන බංගලාදේශ ජාතික පක්ෂයේ සාමාජිකයින් නවදෙනකුට මරණ දඬුවම ද තවත් පුද්ගලයින් 25දෙනකුට ජීවිතාන්තය දක්වා සිරදඬුවම් ද නියම කර ඇත.

සිද්ධියට සම්බන්ධ තවත් 13 දෙනකුට වසර 10 බැගින් සිරදඬුවම් ද නියම කර ඇතැයි වාර්තා වේ.

ඒ වන විට ෂෙයික් හසීනා බංගලාදේශයේ විපක්ෂ නායිකාව වූ අතර ඇගේ ප්‍රධාන ප්‍රතිවාදියා වූ බෙගම් ඛලීඩා සියා අගමැතිනිය විය.

මේ වන විට ඛලීඩා සියා හා ඇගේ බංගලාදේශ ජාතික පක්ෂය ප්‍රධාන විපක්ෂය වේ.

ෂෙයික් හසීනා ගමන් කළ දුම්රියට බෝම්බ වීසි කර වෙඩි තබා ඇයව ඝාතනය කිරීමට තැත් කළ බව සැකකරුවන්ට එරෙහිව තිබූ ප්‍රධාන චෝදනාව විය.

ඩකා අගනුවරින් කිලෝමීටර් 160ක් දුරින් පිහිටි පබ්නා නගරයේදී මෙම ප්‍රහාරය එල්ල විය.

රජයට එරෙහිවන්නන් හා විවේචනය කරන්නන් මර්දනය කිරීම සහ සිරගත කිරීම සම්බන්ධව හසීනාගේ රජය වෙත චෝදනා එල්ල වී ඇති අතර හිටපු අගමැතිනී ඛලීඩා සියා ද දූෂණ චෝදනා මත මේවනවිට සිරගතව සිටියි.

(රොයිටර් පුවත් ඇසුරිණි - 085)