ජෝර්දානයේ ගොවිපලක ඇති වූ ගින්නකින් පකිස්තාන ජාතිකයින් 13 දෙනකු මියගොස් ඇතැයි වාර්තා වේ.

මියගිය අය අතර ළමුන් අටදෙනකු සහ කාන්තාවන් සිව්දෙනකු සිටින බව එරට බලධාරීහු කියති.

ජෝර්දානයේ අගනුවර වන අම්මාන් නගරයට බටහිරින් ග්‍රාමීය පෙදෙසක මෙම ගොවිපල පිහිටා ඇත.

විදුලි කාන්දුවක් හේතුවෙන් ගින්න හටගෙන ඇතැයි පොලිසිය පවසයි.

ගින්නෙන් තිදෙනකු තුවාල ලබා ඇති අතර කම්කරුවන් නැවතී සිටි තාවකාලික නිවාස කිහිපයක් විනාශ වී ඇත.

සංක්‍රමණික කම්කරුවන් දහස් ගණනක් ජෝර්දාන් නිම්නයේ පෞද්ගලික ගොවිපලවල් වල සේවය කරන බව බලධාරීහු කියති.

(බීබීසී ඇසුරිණි - 085)