ලන්ඩනයේ හීත්‍රෝ ගුවන් තොටුපළට ගොඩබැස්වීමට ගිය යානයක රෝද අඩංගු කුටියේ සැඟවී සිටියේ යැයි සැකකරන පුද්ගලයකුගේ සිරුර අසළ ගෙවත්තක වැටී තිබියදී හමුවී ඇතැයි වාර්තා වේ.

ක්ලැෆැම්හි ඔෆර්ටන් මාර්ගයේ ගෙවත්තකින් මෙම සිරුර හමුවී ඇත.

නයිරෝබි සිට පැමිණි කෙන්යා ගුවන් සේවයට අයත් යානයකින් මොහු ඇදවැටෙන්නට ඇතැයි සැකකරන බව පොලිසිය පවසයි.

අසළ පිහිටි ගෙවත්තකට මිනිසෙකු ඇදවැටෙනු දුටු බව එම ප්‍රදේශයේ නිවැසියකු පවසා ඇත.

සිරුර ඇදවැටුණු ස්ථානයේ පිහිටි නිවසේ හිමිකරු පවසා ඇත්තේ විශාල ශබ්දයක් ඇසී ඉහළ මහලේ ජනේලයෙන් බලන විට ලේ වැකුණූ සිරුරින් යුතු මිනිසෙකු බිමවැටී සිටිනු දුටු බවයි.

මිදුලේ හා බිත්ති වලද ලේ විසිරී තිබුණු බවත් සිරුර හඳුනාගත නොහැකි තරම් පොඩි වී තිබුණු බවත් ඔහු වැඩිදුරටත් පවසා ඇත.

ගුවන් ගමන් නිරීක්ෂණය කරමින් සිටි පුද්ගලයකු ද මෙම සිද්ධිය නිරීක්ෂණය කර ඇතැයි පොලිසිය පවසයි.

කෙන්යා ගුවන් යානයේ රෝද කට්ටල රඳවන කුටියේ තිබී බෑගයක්, ජලය සහ ආහාර සොයාගෙන තිබේ.

පොලිසිය පවසන්නේ එසේ ඇදවැටුණේ නයිරෝබි ගුවන්තොටුපළ සේවකයකු බවට සැකකරන බවයි. මෙවැනි සිදුවීම් විටින් විට වාර්තා වන බව හීත්‍රෝ ගුවන් බලධාරීහු පවසති.

(බීබීසී ඇසුරිණි - 085)