ඕස්ට්‍රේලියාවේ නිව්සවුත් වේල්ස් ප්‍රාන්තයේ ලැව්ගිනි පෙර නොවූ ආකාරයෙන් අසාමාන්‍ය ලෙස වර්ධනය වෙමින් පවතින බව බලධාරීහු පවසති.

මේ වනවිට ස්ථාන 90ක ලැවිගිනි හටගෙන ඇති අතර තද සුළං සහ සෙල්සියස් අංශක 35කට අධික උෂ්ණත්වය ගින්න තීව්‍ර කරන බව සඳහන් වේ.

දැඩි ලෙස නියඟයෙන් පීඩා විඳින ප්‍රදේශවල මෙම ලැව්ගිනි හටගෙන ඇත.

ස්ථාන කිහිපයක පුද්ගලයින් නිවෙස්වල සිරවී සිටින බවට වාර්තා වන නමුත් ගින්නේ ප්‍රබලත්වය හේතුවෙන් කාර්ය මණ්ඩලයට ඔවුන් වෙත ළඟාවීමට නොහැකි බව ගිනි නිවන අංශ පවසයි.‍

ගින්න මැඩපැවැත්වීම සඳහා භටයින් 1000ක් පමණ යොදවා ඇතැයි ද මේ වනවිට වෙරළබඩ කිලෝමීටර් 1000ක පමණ ප්‍රදේශයක් පුරා ගිනිගැනීම් පැතිර ඇතැයි ද ඔවුහු පවසති.

ක්වීන්ස්ලන්ඩ් හා ඕස්ට්‍රේලියාවේ බටහිර පෙදෙස්වලටද අනතුරු ඇඟවීම් කර ඇත.

නිව්සවුත් වේල්ස්හි පසුගිය සතියේ ඇතිවූ ලැව්ගිනි වලින් කෝලා වලසුන්ගේ අභය භූමියක් ඇතුළු හෙක්ටයාර 2000ක් පමණ විනශ විය.

(බීබීසී ඇසුරිණි - 085)