(රංජිත් රාජපක්ෂ)

ආයුර්වේද දෙපාර්තුමේන්තුවේ ලියාපදිංචි නොවී ආයුර්වේද වෛද්‍යවරයකු වශයෙන් පෙනී සිටිමින් හැටන් නගරයේ ආයුර්වේද  මධ්‍යස්ථානයක් පවත්වාගෙන ගිය ව්‍යාජ වෛද්‍යවරයකු හැටන් පොලිසිය මගින් අද (10) අත්අඩංගුවට ගනු ලැබීය.

ආයුර්වේද දෙපාර්තුමේන්තුවේ ලියාපදිංචි වී ඇති ආයුර්වේද වෛද්‍යවරයකුගේ ලියාපදංචි අංකය යටතේ සැකකරු හැටන් බස් නැවතුම්පොළ භූමියේ මෙම ආයුර්වේද මධ්‍යස්ථානය කාලයක් තිස්සේ පවත්වාගෙන ගොස් ඇති බව සිදු කළ පරීක්ෂණවලදී අනාවරණය වී ඇති බව හැටන් පොලිසිය පවසයි.

අස්ථි බිදීම් ඇතුළු විවිධ රෝග සඳහා ආයුර්වේද ප්‍රතිකාර සැකකරු විසින් සිදු කර ඇති අතර ප්‍රතිකාර දිම සඳහා සැකකරුගේ වෛද්‍ය මධ්‍යස්ථානයේ තිබී ප්‍රතිකාර ලබාදිම සදහා උපයෝගි කරගත් උපකරණ සහ ආයුර්වේද ඖෂධ ගණනාවක් ද පොලිස් බාරයට ගෙන ඇත.

අත්අඩංගුවට ගත් සැකකරු හැටන් මහෙස්ත්‍රාත් අධිකරණය වෙත ඉදිරිපත් කිරීමට නියමිතය.