(කාංචන කුමාර ආරියදාස)

බාලවයස්කාර දැරියකට බරපතල ලිංගික අපරාධයක් සිදුකර පොලිසියෙන් සැඟවී සිටි පුද්ගලයකු අද (19) කිසියම් පිරිසක් විසින් දැරිය දූෂණය කළ ස්ථානයටම රැගෙන ගොස් පහර දී ඝාතනය කර ඇතැයි ගල්කිරියාගම පොලිසිය කියයි.

මෙසේ ඝාතනයට ලක්ව ඇත්තේ ගල්කිරියාගම පොලිස්බල ප්‍රදේශ දඹුලු හල්මිල්ලෑව හබරත්තාවල  ප්‍රදේශයේ පදිංචි ඩී. එම්. දසනායක (50) පුද්ගලයෙකි.

දඹුලු හල්මිල්ලෑව හබරත්තාවල  ප්‍රදේශයේ දරුවන් පස් දෙනෙකුගෙන් යුත් ඉතා අසරණව සිටින පවුලක 10 හැවිරිදි දැරියක මෙම පුද්ගලයා විසින් රවටා ගෙන  පසුගිය දිනක ඔහුගේම වම්බටු හේනක රැගෙන ගොස් මෙම අපරාධය සිදු කර තිබෙන බව දෙමව්පියන් ගල්කිරියාගම පොලිසියට පැමිණිලි කර ඇත.

පොලිස් ප්‍රශ්න කිරීම්වලදී හෙළි වී ඇත්තේ 10 හැවිරිදි මෙම දැරිය අපයෝජනයට ලක්කර ඔහුගේම තවත් මිතුරකුට මෙම දැරිය අපයෝජනයට ලබාදී තිබෙන බවත්  ඒ අනුව එම පුද්ගලයා ද  ප්‍රදේශයේම පදිංචිකරුවකු බවත් ඔහු මේ වන විට ප්‍රදේශයෙන් පලා ගොස් තිබෙන බව පොලීසිය පවසයි.

සැකකරුගේ ඝාතනය සම්බන්ධයෙන් ගල්කිරියාගම පොලිසිය වැඩිදුර පරීක්ෂණ පවත්වයි.