(සිතුම් චතුරංග)

ත්‍රස්ත ක්‍රියා සම්බන්ධයෙන් යුද හමුදාව විසින් අත්අඩංගුවට ගත් පලෙයි රෝහලේ වෛද්‍යවරයා නිදහස් කරන ලෙසට ඉල්ලා පලෙයි ප්‍රදේශවාසීන් හා දේශපාලන නියෝජිතවරු පිරිසක් අද (23) පලෙයි හීදි විරෝධතා පාගමනක නිරතවූහ.

වෛද්‍යවරයාට නිදහස ඉල්ලා පලෙයි රෝහල අසල පැය කිහිපයක් විරෝධතාකරුවෝ උද්ඝෝෂණය කිරීමෙන් පසුව පලෙයි ප්‍රාදේශීය ලේකම් කාර්යාලය දක්වා පාගමනක නිරතවූහ.

ප්‍රදේශවාසීන් පැවසූයේ පසුගිය 18 වැනිදා අත්අඩංගුවට ගත් වෛද්‍යවරයා මේ වන තෙක් අධිකරණයකට ඉදිරිපත් නොකර ඇති බවයි.

මෙලෙස වෛද්‍යවරයා අත්අඩංගුවට ගත්තේ අතුරුදන් කිරීමට උත්සහ කිරීමට ද යන්න සැකයක් මතුව ඇති බවත් ප්‍රදේශවාසීහු පැවසූහ.

වෛද්‍යවරයා අත්අඩංගුවට ගැනීමෙන් පලෙයි රෝහලේ කටයුතු හා රෝගීන්ට ප්‍රතිකාර ලබාදීම් ද තාවකාලිකව ඇණහිට තිබේ.

වෛද්‍යවරයා අත්අඩංගුවට ගැනීමෙන් පසුව මීට ඉහතදී ද පලෙයි රෝහල ඉදිරිපිට විරෝධතාවක් පැවැත්විණි. 

විරෝධතාකරුවන් විසින් ජනාධිපතිවරයාට සහ අග්‍රාමාත්‍යවරයාට ලබාදීම සඳහා සකස් කළ සංදේශයක් පලෙයි ප්‍රාදේශීය සභාවේ නිලධාරීන් වෙත බාරදෙනු ලැබීය.

පලෙයි ප්‍රදේශවාසීහු, පලෙයි ප්‍රාදේශීය සභා නියෝජිතවරු හා දෙමළ ජාතික සන්ධාන පක්ෂ ක්‍රියාකාරීහු ඇතුළු විශාල පිරිසක් විරෝධතාව සඳහා එක්ව සිටියහ.