(හිරාන් ප්‍රියංකර ජයසිංහ)

ආණමඩුව හලාවත මාර්ගයේ කුමාරගම ප්‍රදේශයේදී අද (24) සවස ගුවන් හමුදා ට්‍රක් රථයක ගැටීමේන් යතුරු පැදියක ගමන් කළ පුතු මරණයට පත්ව මව බරපතල තුවාල ලබා ඇති බව ආණමඩුව පොලිසිය කියයි.

මෙසේ මරණයට පත්ව ඇත්තේ බිංගිරිය බෝවත්ත ප්‍රදේශයේ පදිංචි 37 හැවිරිදි පැතුම් ශ්‍රී සමන්තිලක නැමති අයකු බව කියයි.

අනතුරට ලක්වු මව හා පුතු කඩිනමින් ආණමඩුව මුලික රෝහලට ඇතුලත් කර තිබු අතර එහිදී පුතා මරණයට පත්වු බවත් බරපතල තත්වයේ පසුවු මව පුත්තලම මුලික රෝහලට ප්‍රථිකාර සදහා යොමු කර ඇති බව පොලිසිය පවසයි.

මරණයට පත්වු තැනැත්තා සිය මව සමග යතුරු පැදියෙන් ආණමඩුව දෙසට ගමන් කරමින් සිටියදි ආණමඩුව දෙසින් පැමිණි ගුවන් හමුදා ට්‍රක් රථය කුමාරගම අතුරු මාර්ගයට එකවර  හැරවීමේදී යතුරු පැදිය ට්‍රක් රථයේ ගැටී ඇති බව කියයි.

අනතුරට සම්බන්ධව ගුවන් හමුදා ට්‍රක් රථය ආණමඩුව මධ්‍ය මහා විද්‍යාලයේ ක්‍රිඩාංගණය ප්‍රතිසංස්කරණය කිරිමට බොරළු රැගෙන එමට යමින් සිටියදී මෙම අනතුර සිදුව ඇති බව පොලිසිය කියයි.

අනතුර සම්බන්ධව ගුවන් හමුදා ට්‍රක් රථ රියදුරා පොලිසිය මගින් අත්අඩංගුවට ගෙන තිබුණි.