(ඩී. ජී. සුගතපාල)
 
ගාල්ල හිරිඹුර ප්‍රදේශයේ එකම පවුලේ දරුවන් දෙදෙනෙකු ඩෙංගු රෝගය වැළඳී මියයාමත් සමඟ කෝපයට පත් ප්‍රදේශයේ ජනතාව ඉකුත් සිකුරාදා(12) ගාල්ල කරාපිටිය මාර්ගය අවහිර කරමින් අලුතෙන් ඉදිකරගෙන යනු ලබන  පෞද්ගලික රෝහල් ගොඩනැගිල්ලකට සහ එහි උපකරණවලට ගිනි තබා හානි කිරිමේ සිද්ධියේ දර්ශන පොලිසියට ලබාදෙන ලෙසට ගාල්ල වැඩ බලන මහේස්ත්‍රාත් සෝමසිරි උඩුවැල්ල මහතා අද (16) රූපවාහිනී ආයතනවලට නියෝගයක් නිකුත් කළේය.
 
වැඩ බලන මහේස්ත්‍රාත්වරයා මෙසේ නියෝග කළේ ගාල්ල පොලිසිය කරන ලද ඉල්ලීමක් සළකා බැලීමෙන් පසුවය.
 
ඉකුත් 4වනදින හිරිඹුර ප්‍රදේශයේ පස් හැවිරිදි පිරිමි ළමයෙකු ඩෙංගු රෝගයෙන් මියගිය ඇති අතර ඔහුගේ අට හැවිරිදි  සොහොයුරාද ඩෙංගු රෝගයෙන් 12වන දින මිය ගියේය. ඒ සමඟ කුපිතවු ජනතාව ගාල්ල කරාපිටිය මාර්ගයේ ටයර් පුළුස්සා අවහිර කළ අතර මේ නිසා කරාපිටිය රෝහලට යාමට පැමිණි රෝගීන් ඇතුළු විශාල පිරිසක් අපහසුවට පත්වූහ. ගාල්ල වඳුරඹ, ගාල්ල- මාපලගම, ගාල්ල -යක්කලමුල්ල, ගාල්ල- අක්මීමණ ආදි මාර්ගවල ගමන් ගන්නා වාහනවලටද ගමන් කිරීමට නොහැකිවීම නිසා විශාල වාහන තදබදයක්ද පැවතිණි.
 
එහි පැමිණි ගාල්ල මහ නගර සභාවේ ගිනි නිවීමේ ඒකකයේ රථ දෙකකටද විරෝධතාකරුවන් පහරදීම එක් රථයකට අලාභ හානි සිදුවිය. විරෝධතාකරුවෝ ඩෙංගු මදුරුවන් බෝවන්නේ  ඒ අසළ ඉදිකරමින් පවතින පුද්ගලික රෝහල් වැඩ බිමකින් බව පවසා ඊට ඇතුළු වී ගොඩනැගිලිවලට සහ ඉදිකිරීම් සමාගමේ යන්ත්‍ර සූත්‍රවලටද ගිනි තැබූහ.
 
මෙම සිද්ධියෙන් පසුව සිදුවූ අලාභ හානි සම්බන්ධයෙන් ඒ ඒ ආයතන විසින් පැමිණිලි කර ඇති අතර සිදුව ඇති අලාබ පසුව ලබාදියයුතු බවද පැමිණිලිකරුවෝ පවසා ඇත.
 
එම පැමිණිලි අනුව අධිකරණයට කරුණු වාර්තාකර විරෝධතාවේ දර්ශන ලබා ගැනීම සඳහා රූපවාහිනි ආයතනවලට නියෝගයක් නිකුත් කරන ලෙස පොලිසිය කරන ලද ඉල්ලීම සළකා බැලූ වැඩ බලන මහේස්ත්‍රාත්වරයා මෙම නියෝගය නිකුත් කළේය.