(එෆ්.අස්ලම්)

ගෝඨාභය රාජපක්ෂ මහතාගේ ආර්ථික වැඩපිළිවෙළ ශක්තිමත් කරගැනීම සඳහා ආණ්ඩුක්‍රම ව්‍යවස්ථාවේ පවතින සමහර ප්‍රතිපාදන වෙනස් කළ යුතුව ඇති බවත් ජනාධිපතිවරයාගේ බලාපොරොත්තුව ද එය බවත් අධිකරණ මානව හිමිකම් සහ නීති ප්‍රතිසංස්කරණ අමාත්‍ය නිමල් සිරිපාල ද සිල්වා මහතා පැවසීය.

ඒ සඳහා පාර්ලිමේන්තුවේ තුනෙන් දෙකක බලය ජනාධිපතිවරයාට ලබාදිය යුතු බවද අමාත්‍යවරයා සදහන් කළහ.

මහියංගණය රිදීමාලියද්ද ප්‍රදේශයේ පැවති ජනහමුවකට එක්වෙමින් අධිකරණ ඇමැති නිමල් සිරිපාල ද සිල්වා මහතා මෙසේ කීවේය.

‘රටේ ආර්ථික වැඩපිළිවෙළ ශක්තිමත් කරන්න ගෝඨාභය රාජපක්ෂ ජනාධිපතිවරයාගේ බලාපොරොත්තුව මීළඟ පාර්ලිමේන්තු මහ මැතිවරණයේ දී තුනෙන් දෙකක බලයක් ලබා ගැනීම ආණ්ඩුක්‍රම ව්‍යවස්ථාවේ තියෙන සමහර ප්‍රතිපාදන වෙනස් කරන්නට අවශ්‍යයි.

එහෙම නම් අපිට අනිවාර්යයෙන්ම එක්සත් ජාතික පක්ෂය එකතු කරගන්න වෙනවා. අපේ පාක්ෂිකයින් එකතු කරගන්න වෙනවා. එහෙම වුණොත් පමණයි අපිට ජනාධිපතිතුමාගේ බලාපොරොත්තුව ඉටුකර දෙන්න පුළුවන්.

අද එක්සත් ජාතික පක්ෂය සීසී කඩ වෙලා තියෙනවා. පරාජයත් සමඟම එක්සත් ජාතික පක්ෂය ගොඩනඟා ගන්නවා වෙනුවට ඔවුන් කරන්නේ එකිනෙකා කුළල් කා ගැනීම එක්සත් ජාතික පක්ෂයේ තියෙන මේ අර්බුදය නිසා එක්සත් ජාතික පක්ෂය වැරදි මඟක ගියා. එක්සත් ජාතික පක්ෂය ගත් වැරදි දේශපාලන තීන්දු තීරණ පරාජයට පත්වෙලා අසරණභාවයට පත්ව සිටිනවා. එක්සත් ජාතික පක්ෂ පාක්ෂිකයින් අපි ඉතාමත් ආදරයෙන් අප වැළදගන්නා බව ප්‍රකාශ කරනවා’ යැයි අමාත්‍යවරයා කියා සිටියේය.