වලාන දූෂන මර්දන ප‍්‍රහාරක ඒකකය පැමිණිලි විභාග කරන්න පවත්වාගෙන යනු ලබන පොලිසියක් නොවේ. පොලිස්පති යටතේ ක‍්‍රියාත්මක වන මෙම ආයතනයේ මූලික කාර්යභාරය වන්නේ දූෂණ යටතට වැටෙන සියලූම වර්ගයේ අපරාධ පිළිබඳව විමර්ශනයන් සිදුකිරීම හා වැටලීම් කිරීමය. ඒ අනුව ආඥා පනත් රැසක් යටතේ ක‍්‍රියාත්මක වීමට මෙම ඒකකයට බලය ලැබී තිබේ. එනම් සුරාබදු ආඥාා පනත, ගණිකා නිවාස ආඥාා පනත, විෂ මත්ද්‍රව්‍ය ආඥාා පනත, මාදක හා මනෝවර්ධක ආඥාා පනත, ගිනි අවි ආඥාා පනත ඇතුළු ආඥාා පනත් ගණනාවක් යටතේ වැටලීම් සිදුකරනු ඇත. එසේම පොලිස්පති වෙත ලැබෙන පැමිණිලි, වෙනත් පොලිස් ස්ථානවලට පැමිණීලි කර නොවිසඳුණු පැමිණිලි සම්බන්ධයෙන් පරික්ෂණ සිදුකිරීමද වලාන දූෂණ මර්දන ප‍්‍රහාරක ඒකකය වෙත පැවරේ.  

නිධන් හොරුන් අල්ලාගත් පොලිස් කණ්ඩායම

එවැනි අපූරු වැටලීමක් පසුගියදා වලාන දූෂණ මර්දන ප‍්‍රහාරක ඒකකය විසින් සිදුකරන ලදී. ඒ තමන් වෙත ලද තොරතුරකට අනුව ය. නිධානයකින් ගොඩගත් චෛත්‍යයක අනුරුවක් කෝටි පනස් පහකට විදේශිකයෙකුට විකිණීමට ඇඹිලිපිටිය ප‍්‍රදේශයේ තරුණයින් දෙදෙනෙකු සූදානම් වන බව එම තොරතුරෙන් කියැවිණ.   

මේ ආරංචිය ලැබුණ වහාම පොලිස්පති පූජිත් ජයසුන්දර මහතාගේත්, වලාන දූෂණ මර්දන ප‍්‍රහාරක ඒකකයේ මාණ්ඩලික නියෝජ්‍ය පොලිස්පති ප‍්‍රියන්ත ජයකොඩි මහතාගේත් උපදෙස් පරිදි හා සහකාර පොලිස් අධිකාරි හේමාල් ප‍්‍රශාන්ත මහතාගේ අධීක්ෂණය යටතේ වලාන දූෂණ මර්දන ප‍්‍රහාරක ඒකකය වැටලීමට අවශ්‍ය කටයුතු සූදානම් කළේය.   

මේ සැකකරුවන් දෙදෙනා හඳුනාගැනීමට තොරතුර ලබාදුන් අයගේ සහය අවශ්‍ය විය. ඒ අනුව වලාන දූෂණ මර්දන ප‍්‍රහාරක ඒකකයේ ස්ථානාධිපති ඇතුළු කණ්ඩායම තොරතුර දුන් පුද්ගලයා හමුවිය. එහිදී ලද තොරතුර අනුව මේ කුඩා චෛත්‍යය කළුගලින් නිමවන ලද නිල්මැණික් රතු මැණික් එබ්බවූවකි. එසේම එහි දඹරන් පිළිමයක් ද තැන්පත් කර ඇති බවටද දැනගන්නට ලැබිණ. පරීක්ෂකයෝ චෛත්‍යය විකිණීමට සැලසුම් කළ තරුණයින්ගෙන් කෙනෙකුගේ දුරකථන අංකය සොයා ගත්හ. සැලසුම සකස් කෙරිණ.   

මේ අතරතුර නිධන් වස්තුවක් හිමිවූ තරුණයින් දෙදෙනාට තමන්ගේ හිතවතෙක් මාර්ගයෙන් හිමිනමක් හඳුනාගන්නට ලැබිණ.

විහාරස්ථානයේ අවශ්‍යතාවකට උදව්වක් ලබාගැනීමට බව කියමින් මිතුරා මගින් හඳුනාගත් හිමිනම පසුව දුරකථනයෙන් කතා කර ඔවුන් සතුව පවතින නිධන් වස්තුව ඉල්ලා සිටියහ. මෙම නිධන් වස්තුව ලැබෙන්නේ නම් තමන් ඉතා සතුටට පත්වන බවත් එය තමන් වෙත ලබාදීම තමන්ට කරන ගෞරවයක් බවත් ඒ හිමිනම තරුණයින්ට පැවැසූහ. මෙවැනි වස්තුන් පිළිබඳව ඉදිරියේදීද යම් තොරතුරක් ලදොත් තමන්ට පවසන ලෙසද ඉල්ලා සිටි මේ හිමිනම එය මිලදී ගැනීමට තමන්ට හැකි බවද දැන්වීය.  

තමන් මෙය විදේශිකයෙකුට කෝටි පනස් පහකට ලබාදීමට සූදානම් බව තරුණයෝ මේ හිමි වෙත දැනුම් දුන්හ. එතරම් මුදලක් ලබාදීමට වත්කමක් දැනට තමන් වෙත නැති බව පවසමින් මඳක් පසුබා සිටි මේ හිමියෝ පසුදින නැවත කතා කළහ. තමන්ට උදව් කිරීමට විදේශගතව සිටින ශ්‍රී ලාංකිකයින් පිරිසක් සූදානම් බවත් ඒ නිසා අදාළ මුදල ගෙවීමට තමන්ට හැකියාව ඇති බවත් පවසමින් නැවත කතා කළහ. මේ භික්ෂූන් වහන්සේගෙන් බේරෙන්නට බැරි බව දැනගත් තරුණයෝ දෙදෙනා විදේශිකයාට නිධන් වස්තුව විකිණීමේ අදහස අත්හැර දමා ඒ ගනුදෙනුවට මේ හිමිනම ආදේශ කරගත්හ.   

“හාමුදුරුවනේ අපි උණු උණුවේ කෑෂ් පිට මේ ගනුදෙනුව කරගන්නයි හිටියේ. ඒක නැවැත්තුවේ විදේශිකයෙකුට දෙනවාට වඩා අපේ හිතටත් හොඳයිනේ අපේ රටේ අපේ හාමුදුරු නමකට අපේ පන්සලකට මේක අයිතිවීම. ඒ නිසයි අපි තීරණය කළේ මේක ඔබ වහන්සේටම දෙන්න ඕන කියලා. හැබැයි හාමුදුරුවනේ හෙට්ටු කරන්න බැහැ, දෙපාරකට සල්ලි දෙන්නත් බැහැ, එකපාර අපි ගනුදෙනුව ඉවර කර ගනිමු” තරුණයෙක් බෞද්ධ භික්ෂූන් වහන්සේට කාරණා පැහැදිලි කළේය.   

“බයවෙන්න එපා මම එකවර කෑෂ් ගෙවනවා. අපිට උදව් කරන්න කට්ටිය ඉන්නවා. අපි කවද්ද කොහේදිද මේ ගනුදෙනුව කරන්නේ?”  
“දෙවැනිදා පාන්දර අපි ඇඹිලිපිටිය චන්ද්‍රිකා වැව ළගට එන්නම් කාටවත් දැනගන්න තියන්න එපා”

 
“මමයි මගේ සහෝදරයෙකුයි අපේ ඇබිත්තයයි එනවා. කමක් නැහැනේ”  

“ඒ අය විශ්වාසද?”  

“අනේ ඔව්. ඒ අය මම එපා කිව්වොත් වෙන කාටවත් කියන්නේ නැහැ. අනික මේ තරම් මුදලක් අරන් මට තනිවම එන්නත් බැහැනේ”  
“හොඳයි එහෙනම් අපි දෙවැනිදාට හමුවෙමු”   

දෙවැනිදාට එළිය වැටිණ. ඇඹිලිපිටිය චන්ද්‍රිකා වැව අසලට හිමිනමක් රැගත් වාහනයක් පැමිණියේය. හාමුදුරුවෝ වාහනයෙන් බිමට බැස වට පිට බැලූවත් කිසිවෙක් පෙනෙන්නට සිටියේ නැත. විනාඩි කීපයකට පසුව ඈතින් ත‍්‍රිරෝද රථයක් පෙනෙන්නට විය. දූවිලි නගමින් අශ්ව වේගයෙන් පැමිණි ත‍්‍රීරෝද රථය හාමුදුරුවෝ වැඩසිටි වාහනයට තරමක් ආසන්නයෙන් නැවැත්වීය. එයින් බැසගත් තරුණයින් දෙදෙනෙක් හාමුදුරුවෝ සමීපයට පැමිණ නම කියා ඇසුවේ හරියටම තමන් සමග ගනුදෙනුවට පැමිණියේ මේ අයමදැයි දැනගැනීමේ උවමනාවෙනි. දෙපාර්ශ්වය හඳුනාගත් පසු ගනුදෙනුව සිදුකෙරිණ. ගනුදෙනුවට පැමිණි හිමියන් වෙනුවෙන් උන්වහන්සේගේ ඇබිත්තයා හා සහෝදරයා ඉදිරිපත්ව මුදල් සහිත බී‍්‍රෆ් කේසය තරුණයින් අතට පත් කළහ. ඔවුහු එය හැර බැලූහ. පන්දහසේ නෝට්ටුවලින් මිටි බැඳ පොරොන්දු වූ මුදල එහි ඇති බවද තරුණයෝ සැකහැර දැනගත්හ.   

“මෙතන ඉඳන් ඕක ගනින්න බැහැනේ. අපි ලක්ෂයේ මිටි සකස්කරලා තියෙන්නේ. වෙලාව තියෙනවා නම් ගණන් කළත් කමක් නැහැ. නැත්නම් ගණන් කිරීම පස්සට තබලා ගැටලුවක් ඇති වුණොත් අපිට කතා කරන්න. දැන් අපිට අපේ වස්තුව දෙනවද?”   

වහාම නිධන් වස්තුව ගනුදෙනුකාර හිමිනම අතට ලැබිණ. එය තනිව ඔසවා ගැනීමට අපහසු වූයෙන් ඇබිත්තයා ඊට සහය විය. කිලෝ විසිඑකක් බරැති, අඟල් දාහතරක් උස අගල් විසිහතරක වටප‍්‍රමාණයෙන් යුත් මෙම චෛත්‍ය අනුරුව තනිකරම කළුගලින් නිමවා තිබිණ. එහි සතරැස් කොටුව අසලින් සතර අතට විහිදුණු බෝකොළ මත නීලවර්ණ, රක්ත වර්ණ මැණික් ඔබ්බවා තිබිණ. එසේම එහි සතරැස් කොටුවේ ආරුක්කු හැඩයට කළ සිදුරක දඹරනින් කළ බුදු පිළිමයක් තැන්පත් කර තිබිණ. ඊට අමතරව මැණික් හෝ වෙන යම් කිසි වටිනා ද්‍රව්‍යයක් හෝ මේ චෛත්‍ය ගැබෙහි ඇති බවට සැකයක් ඇති වූයේ එය සෙලවෙන විට කිසියම් දෙයක් ඇතුළතින් සෙලවෙන බව දැනෙන නිසාවෙනි. සැබැවින්ම එය නිධන් වස්තුවක් විය යුතුයැයි ගනුදෙනුවට ගිය අයට ද සිතිණ.   

නිධන් වස්තුව අතට ගන්නවාත් සමගම පිස්තෝලයක් අතැතිව ඉදිරියට පැන්න රියදුරු එක් තරුණයෙක් අල්ලා ගත්තේය. වැඩේ වැරදුන බව තේරුම් ගත් අනෙක් තරුණයා පැන යන්නට තැත් කළද හිමිනමගේ සහෝදරයා ලෙස පෙනීසිටි පුද්ගලයා ලුහුබැඳ ගොස් එම තරුණයාවද අල්ලා ගත්තේය.   

හිමිනමක් ලෙස තමන්ට අමතා තිබෙන්නේ වලාන දූෂණ මර්දන ප‍්‍රහාරක ඒකකයේ පොලිස් නිලධාරියෙක් බව මේ තරුණයින් තේරුම් ගන්නා විට තමන් අතට මාංචු වැටී අවසන්ය. මේ නාට්‍යයට සම්බන්ධ වී සිටියේ පානදුර වලාන දූෂණ මර්දන ප‍්‍රහාරක ඒකකයේ ස්ථානාධිපති ප‍්‍රධාන පොලිස් පරීක්ෂක රංජිත් රාජපක්ෂ, උපපොලිස් පරීක්ෂක සම්පත්, පොලිස් සැරයන් වික‍්‍රමරත්න, පොලිස් කොස්තාපල්වරුන් වන ජයලාල්, සදීප්, තේනුවර, ජයසිංහ, බණ්ඩාර යන නිලධාරීන් කණ්ඩායමය.   

අත්අඩංගුවට පත් තරුණයින්ට තමන් කවුදැයි හෙළි කරන්නට සිදුවිය. ඒ අනුව තරුණයින් දෙදෙනාගෙන් එක් අයෙක් හිටපු නාවුක හමුදා සෙබළෙකි. මේ හොර ගනුදෙනුවේ ප‍්‍රධානියා ඔහුය. අනෙකා ත‍්‍රී රෝද රථ රියදුරෙකි. මෙය නිධානයකින් ගොඩ ගත් එකක් බවත් එය විකුණා දෙන ලෙස තමන්ට වෙනත් අයෙකු ලබාදුන් බවත් ඔවුහු පොලිසියට කියා සිටියහ. එම පුද්ගලයා සිටින්නේ කොහේදැයි තමන් නොදන්නා බවද මෙය හම්බේගමුව ප‍්‍රදේශයේ විහාරස්ථානයක් අසලින් ලැබී ඇති බව පමණක් තමන් දන්නා බවද සැකකාර තරුණයෝ පොලිසියට පවසා සිටියහ. වැඩිදුර පරීක්ෂණ සඳහා සැකකරුවන් ඇඹිලිපිටිය පොලිසියට භාරදෙනු ලැබිණ.  

මේ පුරාවස්තු කොහෙන් සොරාගත්තේදැයි යන්න තවමත් රහසක්ව පවතී. පොලිස් දෙපාර්තමේන්තුව යටතේ පවතින පුරාවස්තු කොට්ඨාසය හා ඇඹිලිපිටිය පොලිසියේ නිලධාරිහු එක්ව මෙම පුරාවස්තු පිළිබඳව වැඩිදුර විමර්ශන සිදුකරති.