(ඩයනා උදයංගනී සහ සුජිත් හේවාජුලිගේ)

‍ජාතික ජල සම්පාදන හා ජලාපවහන මණ්ඩලය මගින් නැගෙනහිර කොළඹ ජල ව්‍යාපෘති‍යේදී ‍කොන්ත්‍රාත්කරුවකුට රුපියල් කෝටි 22ක මුදලක් වැඩිපුර ගෙවා ඇති බව පොදු ව්‍යාපාර පිළිබඳ කාරක සභාව ‘කෝප් කමිටුව‘ හමුවේ අනාවරණය විය.

මේ සම්බන්ධයෙන් ස්වාධීන විමර්ෂනයක් කර ඊට වගකිව යුතු නිලධාරීන් කවුදැයි සොයාබලා දැනුම් දෙන්නැයිද කෝප් කමිටුව අදාළ අමාත්‍යාංශයේ ලේකම්වරයාට නියෝග කළේය.

කොන්ත්‍රාත්කරුවකු සමඟ ඇතිකරගෙන තිබූ ගිවිසුමකට අනුව බේරුම්කරණ ක්‍රියාවලියේදී නිසි සිද්ධාන්ත අනුගමනය නොකිරීමෙන් මෙම පාඩුව සිදුවූ බව ද හෙළි වූ අතර තවත් මෙවැනි පාඩු සිදුව ඇත්දැයි බැලීම සඳහා වසර හයක බේරුම්කරණ නඩුවල ප්‍රගතිය දැක්වෙන වාර්තාවක් කමිටුවට ඉදිරිපත් කරන ලෙස ද කෝප් කමිටුව ජල සම්පාදන මණ්ඩල ලේකම්වරයාට දැන්වීය.

ඊට අමතරව ජල ව්‍යාපෘති කිහිපයකටම අවශ්‍ය නල ගෙන්වීමේදී අවශ්‍ය ප්‍රමාණය මෙන් කිහිපගුණයක් නල ගෙන්වා ඒවා වරායේ ගබඩා කර තැබීමටද රුපියල් කෝටි ගණනින් මුදල් ගෙවා ඇති බව මෙහිදී හෙළිවිය.

කෝප් කමිටුව එහි සභාපති සුනිල් හඳුන්නෙත්ති මන්ත්‍රීවරයාගේ ප්‍රධානත්වයෙන් රැස්වී ජල සම්පාදන හා ජලාපවාහන මණ්ඩලයේ සිදුව ඇති බව කියන අක්‍රමිකතා සම්බන්ධයෙන් කළ විමර්ශනයේදී මෙම තොරතුරු අනාවරණය විය.