නව ඇමැති මණ්ඩලය ලබන සතියේ

(අජන්ත කුමාර අගලකඩ)  

ලබන බදාදා (05) පැවැත්වෙන මහ මැතිවරණයෙන් තේරී පත්වන අභිනව පාර්ලිමේන්තුව ලබන 20 වැනිදාට පෙර රැස්වනු ඇතැයි රජයේ ආරංචිමාර්ග සඳහන් කරයි.  


නව පාර්ලිමේන්තුව කැඳවන දිනය ඇතුළත් අතිවිශේෂ ගැසට් නිවේදනය ජනාධිපති ගෝඨාභය රාජපක්ෂ මහතා විසින් ලබන සතියේ දී නිකුත් කෙරෙනු ඇති බව ද එම ආරංචිමාර්ග කියයි. 

මහ මැතිවරණයෙ ඡන්ද විමසීම ලබන බදාදා පැවැත්වෙන අතර ප්‍රතිඵල නිකුත් කිරීම ලබන 6 වැනිදාත්, මනාප නිකුත් කිරීම ලබන 7 වැනිදාත් සිදු කෙරේ.  


ඒ අනුව තේරීපත්වන මන්ත්‍රීවරුන්ගේ නාම ලේඛනය මැතිවරණ කොමිෂන් සභාව විසින් ලබන සති අන්තයේ දී ප්‍රකාශයට පත් කෙරෙනු ඇත. මැතිවරණයේ ප්‍රතිඵල අනුව පිහිටුවන නව ආණ්‍ඩුවේ ඇමැති මණ්ඩලය ද ලබන සතියේ පත්කිරීමට බොහෝදුරට ඉඩ ඇත.  


කෙසේ වෙතත් නව පාර්ලිමේන්තුවට තේරී පත්වන මන්ත්‍රීවරුන්ගේ නාම ලේඛනය ගැසට් නිවේදනයක් මගින් ප්‍රකාශයට පත් කිරීමත් සමග පාර්ලිමේන්තුව කැඳවීමේ දිනය ඇතුළත් ගැසට් නිවේදනය ජනාධිපතිවරයා විසින් නිකුත් කෙරෙනු ඇත.  


අභිනව පාර්ලිමේන්තුව රැස්වන දිනය පාර්ලිමේන්තුව විසුරුවා හැරෙන ගැසට් නිවේදනය නිකුත් කෙරෙන දිනයේම ජනාධිපතිවරයා විසින් ප්‍රකාශයට පත් කිරීම මීට පෙර සිදුකරනු ලැබුවද මෙවර කොවිඩ් 19 වයිරසයත් සමග ඇතිවූ තත්ත්වය හේතුවෙන් එය වෙනස් විය.