(විනීතා එම් ගමගේ)


රාජ්‍ය සේවයේ දිනෙක අවම වැටුප රුපියල් 1281 ක් වන අතර වතු සේවක අවම වැටුප ද එම ප‍්‍රමාණය දක්වා වැඩිකරන ලෙස ජාතික වෘත්තිය සමිති මධ්‍යස්ථානය ඉල්ලා සිටින බව එම මධ්‍යස්ථානයේ සභාපති වසන්ත සමරසිංහ මහතා ලංකාදීපයට පැවැසීය. 

මේ වනවිටත් වතු කම්කරු දෛනික වැටුප රුපියල් 400 ත්, 500 ත් අතර වන බව කියා සිටි සමරසිංහ මහතා අගෝස්තු මාසය වනවිට ජීවන වියදම රුපියල් 5649 කින්  වැඩිව පවතිද්දී මෙම වැටුප කිසිසේත්ම ප‍්‍රමාණවත් නොවන බව ද සඳහන් කළේය.

මේ නිසා වතු කම්කරුවන්ට දෛනික වැටුප රුපියල් 1281 ක් හෝ ඊට ගැලපෙන මාසික වැටුපක් දක්වා වැඩි කරන ලෙසත් රජයෙන් ඉල්ලා සිටින  බව ද හෙතෙම සඳහන් කළේය. 

රාජ්‍ය හා පෞද්ගලික අංශවලට ද මෙම ජීවන වියදම වැඩිවීම දරාගත නොහැකි තත්ත්වයක් පවතින බව කී සමරසිංහ මහතා ඔවුන්ගේ වැටුප වැඩි කිරීම කෙරෙහි ද අවධානය යොමු කළ යුතු බව පෙන්වා දුන්නේය. 

2016 ජනවාරියේ සිට කපා හැර ඇති රාජ්‍ය සේවයේ විශ‍්‍රාම වැටුප යළි ලබා දෙන ලෙස ද ඉල්ලා සිටින බව කී සභාපතිවරයා මෙම ඉල්ලීම් ඉටු කර ගැනීමට දැවැන්ත විරෝධතාවක් ආරම්භ කිරීමට ජාතික වෘත්තිය සමිති මධ්‍යස්ථානය සැලසුම් කර ඇතැයි ද සඳහන් කළේය.