(ඩයනා උදයංගනී)

මෙරට සිදුවූ මහ බැංකු වංචාවට සම්බන්ධ ප්‍රධාන වගඋත්තරකරු අත්අඩංගුවට ගැනීම සඳහා සිගප්පූරුවෙන් ලැබිය යුතු සහයෝගය නොලැබෙන බව ජනාධිපති මෛත්‍රීපාල සිරිසේන මහතා පැවසීය.

එම වගඋත්තරකරු සිටින බව කියන සිංගප්පූරු රජය මේ ගැන මීට වඩා වගකීමක් ගත යුතු බව කී ජනාධිපතිවරයා අඩුම තරමින් එම පුද්ගලයා එරට තුළ සිටින්නේද නැද්ද යන්න ගැන පැහැදිලි ප්‍රකාශයක් හෝ සිංගප්පූරු රජය කළ යුතු යැයි සඳහන් කළේය.
 

මහබැංකු වංචාව පිළිබඳ සෙවීමේ ජනාධිපති විමර්ශන කොමිෂන් සභාව කටයුතු කළ ආකාරය සම්බන්ධයෙන් මෙන්ම ඒ පරීක්‍ෂණ තවමත් කරගෙන යාම ගැන සතුටු විය හැකි වුවත් එහි ප්‍රධාන වගඋත්තරකරු තවම අත්අඩංගුවට ගැනීමට නොහැකි වී තිබීම ගැන තමන් කණගාටු වන බව ද ජනාධිපති මෛත්‍රීපාල සිරිසේන මහතා ප්‍රකාශ කළේය.
 
මෙම වගඋත්තරකරු අත්අඩංගුවට ගැනීම සඳහා අධිකරණයෙන් අන්තර් ජාතික වරෙන්තු නිකුත් කර තිබියදීත් සිංගප්පූරු රජය මේ ගැන පසුබෑමක සිටින බව පෙනෙන්නේයැයි ද ජනාධිපතිවරයා කීවේය.
 
ජනාධිපති මෛත්‍රීපාල සිරිසේන මහතා මේ බව පැවසුවේ අල්ලස හා දූෂණය තුරන් කිරීමේ පස් අවුරුදු සැලැස්ම එළිදැක්වීම වෙනුවෙන් කොළඹ ෂැංග්‍රිලා හෝටලයේදී අද (18) පැවැති උත්සවයේ ප්‍රධාන ආරාධිතයා ලෙස එක්වෙමිනි.
 

තමන් පසුගිය දිනෙක සිංගප්පූරුවේ පැවති එක්සත් ජාතීන්ගේ ආසියාතික සංවිධානවල පරිසර සමුළුවට සහභාගීවීමට ගියේද එහි යාමේ අවශ්‍යතාවක් තිබූ නිසාම නොව මහබැංකු වංචාවේ ප්‍රධාන වගඋත්තරකරු භාරදීම ගැන සිංගප්පූරු රජය සමඟ සාකච්ඡා කිරීමේ අරමුණින් යැයි ද ජනාධිපතිවරයා මෙහිදී සඳහන් කළේය.
   එහිදී තමන් සිංගප්පූරු අගමැතිතුමා සමඟ සාකච්ඡා කර අන්තර්ජාතික වරෙන්තු නිකුත් කර ඇති සිංගප්පූරු පුරවැසියෙකු වන මෙම වගඋත්තරකරු අපට ලබාදිය නොහැකිදැයි ඇසූ බව කී ජනාධිපතිවරයා ඒ අවස්ථාවේ එරට අගමැතිවරයා සිංගප්පූරුවේ පුරවැසියෙකු වුවත් එවැනි ප්‍රශ්නයකට සම්බන්ධ නම් ඒ ගැන කටයුතු කිරීමට පසුබට නොවන බව පැවසුවේ යැයි ද කීවේය.

නමුත් අද වන තුරු සිංගප්පූරු රජය මේ සම්බන්ධ පැහැදිලි විවෘත ප්‍රකාශයක් කර නැතැයිද ජනාධිපති මෛත්‍රීපාල සිරිසේන මහතා පැවසීය.
තමා රටේ ජනාධිපතිවරයා වශයෙන් කළ මෙම ප්‍රකාශය මාධ්‍ය ඔස්සේ සිංගප්පූරු රජයට වාර්තා කළත් තමන්ට ප්‍රශ්නයක් නැතැයිද ජනාධිපතිවරයා කීවේය.