(මුදිතා දයානන්ද )
ඉඩෝරය කෙතරම් දරුණු වුවත් විදුලිය කප්පාදු කර ජන ජීවිතය අඩාල කරන්නේ නැතැයි එක්සත් ජනතා නිදහස් සන්ධානයේ මහලේකම් විදුලි බල හා බලශක්ති අමාත්‍ය මහින්ද අමරවීර මහතා අද (13) පැවසීය.
 
ඔහු මේ බව පැවසූයේ ශ‍්‍රි ලංකා ඩාර්ලි පාරේ පිහිටි ශ්‍රී ලංකා නිදහස් පක්ෂ මූලස්ථානයේදි පැවති එක්සත් ජනතා නිදහස් සන්ධාන මාධ්‍ය හමුවේදී අදහස් දක්වමිනි.
 
මේ දිනවල පවතින දැඩි ඉඩෝර තත්ත්වය හමුවේ විදුලිය නිෂ්පාදනය අඩුවිය හැකි බැවින් විදුලි අරපිරිමැස්මෙන් භාවිතා කරන ලෙස ජනතාවගෙන් ඉල්ලා සිටින බවද අමරවිර මහතා පැවසීය. විදුලි කප්පාදුවක් කළහොත් කර්මාන්ත ක්ෂේත‍්‍රය, සංචාරක ක්ෂේත‍්‍රය මෙන්ම සියලූ ආයතන අකර්මන්‍ය විමෙන් තවත් පාඩුවක් සිදුවනු ඇති බවද ඒ නිසා කෙතරම් දුෂ්කර තත්ත්වයක් ඇති වුවද කිසි සේත්ම විදුලි කප්පාදුවක් සිදුකිරිමට බලාපොරොත්තු නොවන බවද ඔහු පැවසීය.
ජනතාවට අඛණ්ඩව විදුලිය සැපයීම සඳහා විදුලි බලාගාර කීපයක් ඉදිරියේදි ආරම්භ කරන බවද මහමැතිවරණයට පෙර ඒ සඳහා මුලික පියවරයන්ට හෝ එළැඹිය හැකි වනු ඇතැයි බලාපොරොත්තු වන බවද ඔහු පැවසීය. විදුලි බල මණ්ඩලය දැනට තිබෙන තත්ත්වය තුළ බිලියන සීයත් එකසිය විස්සත් අතර පාඩු ලබන්න ඉඩ ඇති අතර 2023 වන විට එය ලාභ ලබන ආයතනයක් බවට පත්කරන බවද අමාත්‍යරවයා පැවසීය. විදුලිබල මණ්ඩලය හෝ වෙනත් ආයතනයක් හෝ පාඩු ලබන්නේ කළමණාකරනයේ පවතින අඩුපාඩු නිසා බවද ඔහු පැවසීය.
 
තමන් ධීවර ඇමතිවරයා ලෙස කටයුතු කරන කාලයේදි පාඩු ලබමින් තිබු ධීවර සංස්ථාව වසර හතරකදී ලාබ ලබන් ආයතනයක් බවට පත්කළ බවද අමාත්‍යවරයා වැඩිදුරටත් පැවසීය.