(සම්පත් ප්‍රියනන්දන සහ නාලක ජේ. හෙට්ටිආරච්චි)

ජංගම දුරකතනයක් තම සෙරෙප්පුවේ  රහසිගත ව සඟවා බලන්ගොඩ නගරයේ කාන්තාවන් වීඩියෝ කළ තරුණයෙකු ඔක්තෝබර් (10) දා දක්වා රක්ෂිත බන්ධනාගාර ගත කරන ලෙස බලන්ගොඩ මහෙස්ත්‍රාත් ජයරුවන් දිසානායක මහතා අද (07)  නියෝග කළේය.

බලන්ගොඩ පුවක්ගහවෙල ප්‍රදේශයේ පදිංචි 25 හැවිරිදි තරැණයෙකු මෙලෙස රක්ෂිත බන්ධනාගාර ගත කෙරිණි.
 
ඊයේ (06) බලන්ගොඩ නගරයේ ඉරිදා සතිපොළට එළවළු මිලදී ගැනීමට පැමිණි කාන්තාවන්  මෙසේ වීඩියෝ කරමින් සිටියදී  පොලිසිය අත්අඩංගුවට ගෙන ඇත.
 
මොහු සතුව තිබූ ජංගම දුරකතනය පරීක්ෂා කිරීමේදී එවැනි වීඩියෝ විශාල ප්‍රමාණයක් හමුවී ඇති බවද පොලිසිය කියයි.
 
සැකකරු බලන්ගොඩ පොලිසිය අත්අඩංගුවට ගෙන බලන්ගොඩ මහෙස්ත්‍රාත්වරයා හමුවට ඉදිරිපත් කිරීමෙන් අනතුරුව මෙලෙස රක්ෂිත බන්ධනාගාර ගත කිරීමට නියෝග කෙරිණි.