වැලිකන්ද කොරෝනා රෝහලේ වෛද්‍යවරු දෙදෙනෙක් ලෙඩවෙති

(ක. ග. කරුණාරත්න)

පොලොන්නරුව, වැලිකන්ද කොවිඩ් 19 විශේෂිත ප්‍රතිකාර මධ්‍යස්ථානයේ සේවය කරන වෛද්‍යවරුන් දෙදෙනෙකුට කොරෝනා ආසාදිත වී ඇති බවට අද(26) තහවුරු වී ඇතැයි පොලොන්නරුව දිස්ත්‍රික් මහරෝහලේ අධ්‍යක්‍ෂ විශේෂඥ වෛද්‍ය සම්පත් ඉන්දික කුමාර මහතා ප්‍රකාශ කලේය.

මෙම වෙද්‍යවරුන් දෙදෙනා ත්‍රිකුණාමලය දිස්ත්‍රික්කයේ සිට කොවිඩ් 19 විශේෂිත ප්‍රතිකාර මධ්‍යස්ථානයට රාජකාරී සඳහා පැමිණ ඇත්තේ ඊයේ(25) දිනයේය. එසේ පැමිණ පී.සී.ආර්. පරීක්‍ෂණ සඳහා යොමු කිරීමෙන් පසු එම වාර්තා ලැබෙන තෙක් රාජකාරී සඳහා යොමුවී ඇති බවත්, අද දිනයේ ලැබුණු එම වාර්තාවලින් ඔවුන්ට කෙරෝනා ආසාදිත බවට තහවුරුවී ඇතැයිද කියයි.

එම වෛද්‍යවරුන් දෙදෙනා මේ වනවිට ඒ රෝහලේම නේවාසිකව ප්‍රතිකාර සඳහා යොමුකර ඇතැයිද
විශේෂඥ වෛද්‍ය සම්පත් ඉන්දික මහතා කීය.

ඊට අමතරව මේ වෛද්‍යවරුන් සමඟ රාජකාරී කල ආශ්‍රිතයන් ලෙස හෙද කාර්ය මණ්ඩල සාමාජිකයන්
ඇතුලු සෞඛ්‍ය කාර්ය මණ්ඩලය 10 දෙනෙකු දැනට හඳුනාගෙන සිටින බවත් ඔවුන් පොලොන්නරුවේ පිහිටි නිරෝධායන මධ්‍යස්ථානයෙක නිරෝධායනය සඳහා යොමුකල බවද පැවසීය.

සෞඛ්‍ය කාර්ය මණ්ඩලයේ ආශ්‍රිතයන් තවත් පිරිසක් හඳුනා ගැනීමට සිටින බවත් එම කටයුතු අවසන්වීමෙන් පසු එම පිරිසද නිරෝධායනය සඳහා යොමුකරන බවද රෝහල් අධ්‍යක්‍ෂවරයා වැඩිදුරටත් ප්‍රකාශ කළේය.