(හිරාන් ප්‍රියංකර ජයසිංහ)

වනාතවිල්ලුව ලැක්ටෝ වත්තේ නිවසක්  තුළ කිසියම් පිරිසක් කළ රහසිගතව කැණිමක් සම්බන්ධව රජයේ රස පරික්ෂකවරයාගේ සහ අපරාධ පරික්ෂණ දෙපාර්තුමේන්තුවේ විශේෂ පරීක්ෂණයක් අද (29) දින අරඹා තිබුණි.

වනාතවිල්ලුව ලැක්ටෝ වත්ත නිවසේ ඇතුළත  පොළවේ සිමෙන්ති තට්ටුව කිසියම් පිරිසක් දින කිපයකට පෙර කඩා එහි අඩි කිපයක් ගැඹුරට කැණීම් කරතිබීම සම්බන්ධව වනාතවිල්ලුව පොලිසිය මගින් අපරාධ පරීක්ෂණ දෙපාර්තුමේන්තුව හා රජයේ රස පරීක්ෂකවරයා දැනුවත් කර තිබුණි.

ඒ අනුව අපරාධ පරීක්ෂණ දෙපාර්තුමේන්තුවේ ජ්‍යෙෂ්ඨ සහකාර රුෂාන් ප්‍රනාන්දු මහතා අද (29)  දහවල් අදාළ ස්ථානයට පැමිණ  පරීක්ෂණ ආරම්භ කර තිබුණි. අපරාධ පරික්ෂණ දෙපාර්තුමේන්තුවේ විශේෂ කණ්ඩායමක්ද මෙම පරීක්ෂණ සදහා එක්ව සිටියහ.
 
වනාතවිල්ලුව ලැක්ටෝ වත්ත තුළ විශාල  පුපුරණ ද්‍රව්‍ය තොගයක් මෙම වසරේ ජනවාරි 16 දින අපරාධ පරීක්ෂණ දෙපාර්තුමේන්තුවේ විශේෂ කණ්ඩායමක් සොයා ගෙන තිබු අතර එහිදි සැකකරුවන් සිව්දෙනෙකුද අත් අඩංගුවට ගෙන තිබුණි.
 
ඉන් පසුව අවස්ථා කිපයකදී මෙම ඉඩමේ තිබි ගිනි අවි සහ තවත් දෑ අපරාධ පරික්ෂණ දෙපාර්තුමේන්තුව සොයා ගැනීමට සමත් වි තිබුණි.
 
මෙම ඉඩම තුළ පසුගිය කාලයේ රටේ දේවස්ථාන තුළ සිදුවු පිපිරීම් සම්බන්ධ යම් ක්‍රියාකාරකම් සිදුව ඇති බවට ආරක්ෂක අංශ මගීන් සනාථ කරගෙන ඇත.
 
එම පරීක්ෂණවලට අනුව නාඳුනන පිරිස කළ කැණිම් සම්බන්ධව දීර්ඝ නිරීක්ෂණයක් අපරාධ පරික්ෂණ දෙපාර්තුමේන්තුවේ කණ්ඩායම අරඹා ඇත.
 
කෙසේ වෙතත් එම නිවස හා අවට පිළිබඳව රජයේ රස පරීක්ෂක වෙනුවෙන් පැමිණි නිලධාරීහු ද පරීක්ෂණයක් කර එහි තිබූ ඇතැම් සාම්පල ලබාගත්හ. මෙම අවස්ථාවට වනාතවිල්ලුව පොලිසියේ නිලධාරීන් සමග පුත්තලම මුලස්ථාන පොලිසියේ අපරාධ ස්ථාන නිලධාරීහු ද එක්ව සිටිති.