(ඩයනා උදයංගනී)

එක්සත් රාජධානියේ සිට මෙරටට ගෙන්වා කටුනායක අපනයන සැකසුම් කලාපයේ එළිමහනේ ගොඩ ගසා තිබූ කුණු තොගය මේ වන විට කන්ටේනර් පෙට්ටි 333කට ඇතුළත් කර එහි තැන්පත් කර ඇතැයි මධ්‍යම පරිසර අධිකාරියේ සභාපති ඉසුර දේවප‍්‍රිය මහතා පැවසීය.

මෙම කුණු තොග පරිසරයට විවෘතව තැබීමෙන් සිදුවිය හැකි පරිසර හානි සළකා මෙසේ කන්ටේනර් පෙට්ටිවලට ඇතුළත් කර තැබීමට පියවර ගත් බවද සභාපතිවරයා සඳහන් කළේය.

පරිසර සංවිධානයක් විසින් මෙම කසළ තොගය මෙරටට ගෙන්වීම සම්බන්ධයෙන් අධිකරණයේ නඩුවක් පවරා ඇති බැවින් එහි තීන්දුව ලැබෙන තුරු කසළ මෙරටින් බැහැර කිරීමේ හැකියාවක් නැතැයි ද දේවප‍්‍රිය මහතා කීවේය.

අධිකරණය මගින් ලබාදෙන තීන්දුවෙන් පසු එය නැවත ප‍්‍රතිඅපනයනය කිරීමේ බලය ආයෝජන මණ්ඩලයට හිමිවන බව ද හෙතෙම ප‍්‍රකාශ කළේය.