(නවරත්න සමරතුංග)
පොතුවිල කලපුකට්ටුව කලපුවේ මාළු අල්ලමින් සිටි ධීවරයෙකුට අද (25) සවස 81 වර්ගයේ මොටාර් උණ්ඩ තුනක් හමුවී ඇති බව පොතුවිල පොලීසිය පවසයි.
දැලක් දමා මාලු අල්ලමින් සිටියදී එම දැලෙහි කිසියම් දෙයක් පැටලී ඇති බවත් ඔහු එය ගොඩට ගෙනැවිත් පරීක්ෂා කර බලනවිට කළුපාට ප්ලාස්ටික් දවටනයකින් ඔතා තිබුණ මෙම මෝටර් උණ්ඩ හමුවී බියට පත්ව පොලීසියට දැනුම්දී ඇති බව කියති.
මේවා පසුගිය සුනාමියට එම ස්ථානයේ තිබුණ පොලිස් විශේෂ කාර්ය බලකා කඳවුර ගසාගෙන ගිය අවස්ථාවේ ගිලිහී ගොස් කලපුවට වැටී තිබෙන්නට ඇතැයි ආරක්ෂක අංශ විශ්වාස කරයි. මේ සම්බන්ධව අධිකරණයට කරුණු වාර්තා කරන බව පොතුවිල පොලීසියේ උසස් නිලධාරීයෙකු ‘ලංකාදීප’යට පැවසීය.
අම්පාර කොට්ඨාශය භාර පොලිස් අධිකාරී ගයාන් හසන්ත මාරපන මහතාගේ අධීක්ෂනය මත සහකාර පොලිස් අධිකාරී ප‍්‍රදීප් කුමාර මහාතගේ උපදෙස් අනුව පොතුවිල පොලීසියේ ස්ථානාධිපති පොලිස් පරීක්ෂක නිශාන්ත දිසානායක මහතා ඇතුලු නිලධාරීහූ පරීක්ෂන පවත්වති.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
