(ඩයනා උදයංගනී)

රට නැවත යථා තත්ත්වයට පත්වෙමින් තිබෙන නිසා පවතින නිරෝධායන නීති යටතේ දේවස්ථාන වෙත පැමිණී‍මේ අවස්ථාව කිතුණු බැතිමතුන්ට ලබාදෙන්නැයි මැල්කම් කාදිනල් රංජිත් කොළඹ අගරදගුරුතුමෝ රජයෙන් ඉල්ලා සිටිති.

කොරෝනා වසංගතය පිළිබඳ දැනගත් වහාම දෙව්මැදුරු වසා දමා එය පාලනය කිරීම සඳහා ලබා දිය හැකි උපරිම සහයක් ලබා දුන් කිතුණු ජනතාවට, නැවත වතාවක් රට යථාවත් වෙමින් පවතින අවස්ථාවේ දෙව් මැදුරු වලට එකතු වීමට අවස්ථාව ලබා දෙන ලෙස තමන් රජයෙන් ඉල්ලා සිටින බව ද කොළඹ අගරදගුරුතුමෝ පැවසූහ.

දෙව් මැදුරු වසා දැමූ දින පටන් යාච්ඤා කටයුතු කිරීමට නොහැකිව දේවස්ථාන වලට යාමට මහත් ආශාවෙන් සිටින කිතුණු බැතිමතුන් වෙනුවෙන් නිරෝධායන නීති යටතේ ඒ සඳහා අවස්ථාව ලබා දෙන ලෙස තමන් රජයන් ඉල්ලා ඇතැයි ද අගරදගුරුතුමෝ වැඩිදුරටත් සඳහන් කළහ.