( අජන්ත කුමාර අගලකඩ)

අභාවප‍්‍රාප්ත අරුමුගම් තොණ්ඩමන් මහතාගේ අවසන් කටයුතු විශාල පිරිසකගේ සහභාගීත්වයෙන් තොරව නිරෝධායන නීතිරීති අනුගමනය කරමින් කරන ලෙස කළ දැනුම්දීමට උරණවූ ලංකා කම්කරු කොංග‍්‍රසයේ ප‍්‍රබලයකු සෞඛ්‍ය බලධාරීන්ට දුරකථනයෙන් බැන තර්ජනය කර ඇතැයි සෞඛ්‍ය අමාත්‍යංශ ආරංචි මාර්ග සදහන් කරයි.
 
තොණ්ඩමන් මහතාගේ අවමඟුල් සීමිත පිරිසකගේ සහභාගීත්වයෙන් නිරෝධායන නීතිරීතිවලට අනුව කළ යුතු බව සෞඛ්‍ය අමාත්‍යංශයේ ඉහළ බලධාරියෙකු ලංකා කම්කරු කොංග‍්‍රසයට සම්බන්ධ ප‍්‍රබලයකුට දුරකථනයෙන් දැනුම් දුන් බව අවස්ථාවේ ඔහු අදාළ නිලධාරියාට මෙසේ බැණවැදී ඇතැයි එම ආරංචි මාර්ග කියයි.
 
වතු ජනතාවගේ සහභාගීත්වයෙන් අවමඟුල් කටයුතු කරන බවට අදාළ ප‍්‍රබලයා වහස්බස් දොඩා ඇතැයිද වාර්තාවේ.
 
අනතුරුව සෞඛ්‍ය බලධරයා පොලිස්පතිවරයාට ද මේ බව දැනුම් දී නිරෝධායන නීති කඩකරන්නේද යන්න සොයා බලන ලෙස ඉල්ලීමක් කර ඇති බවද දැනගන්නට ඇත.
 
අවසන් කටයුතු  සිදුවූ අද (31) දිනයේ රටටම ඇදිරි නීතිය පැනවූ නමුත් ඊයේ (30) දිනයේදී නුවරඑළිය දිස්ත‍්‍රික්කයට පොලිස් ඇදිරි නීතිය පැනවූයේ එහි ප‍්‍රථිඵලයක් නිසා බවද වාර්තාවේ.
 
නිරෝධායන නීති කඩකරමින් කටයුතු කරන්නේද යන්න පිළිබදව සොය බැලීමට පොලීසිය සහ හමුදාව විශාල වශයෙන් එම ප‍්‍රදේශයට යොදවා තිබූ බවද වාර්තාවේ.