(බිමල් ශ්‍යාමන් ජයසිංහ සහ සමන් කාරියවසම්)

එක්සත් ජාතික පක්ෂ ජනධිපති අපේක්ෂක සජිත් ප්‍රේමදාස මහතාගේ ප්‍රතිපත්ති ප්‍රකාශනය සමඟ ශ්‍රී ලංකා පොදු ජන පෙරමුණේ ජනාධිපති අපේක්ෂක ගෝඨාභය රාජපක්ෂ මහතාට අපහාස වන පරිදි මුද්‍රණය කරන ලදැයි කියන අත් පත්‍රිකාවක් බෙදා හැරීමේ සිද්ධියක් මුල් කරගෙන දෙපාර්ශවයෙන්ම පානදුර දකුණ පොලිසියට ලද පැමිණිලි සම්බන්ධයෙන් විමර්ශන සිදු කරන බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී රුවන් ගුණසේකර මහතා පැවසීය.

පානදුර නගර සභාවේ උප නගරාධිපති ඇතුළු පාක්ෂිකයින් පිරිසක් පානදුර දුම්රිය පොල අසල පත්‍රිකා බෙදමින් සිටියදී එම ස්ථානයට පැමිණ තිබූ එක්සත් ජනතා නිදහස් සන්ධාන හිටපු නාගරික මන්ත්‍රී මහේෂ් ප්‍රනාන්දු මහතා ඇතුළු පිරිසක් එයට විරෝධය දක්වා ඇත.

‘‘මේ රට අනතුරේ‘‘ ‘‘ඔබේ නිදහස අනතුරේ‘‘ යනුවෙන් පිටු දෙකකින් යුත්  කරුණු ඇතුළත් අත් පත්‍රිකාවක් උප නගරාධිපතිවරයා ඇතුළු පිරිස බෙදමින් සිටි බව හිටපු නාගරික මන්ත්‍රීවරයා කීය.

එම මන්ත්‍රීවරයා පොලිසියට කරන ලද පැමිණිල්ලකට අනුව පානදුර නගරයේ පිහිටා ඇති එක්සත් ජාතික පක්ෂ මෙහෙයුම් කාර්යාලයට ගිය පොලිස් නිලධාරීන් කණ්ඩායමක් එවැනි අත්පත්‍රිකා තොගයක් පොලිසියට භාරයට ගනු ලැබීය.

මෙම සිද්ධිය සම්බන්ධයෙන් හිටපු නාගරික මන්ත්‍රීවරයාගෙන් සහ උප නගරාධිපතිවරයාගෙන් පැමිණිලි ලැබී ඇතැයි ද අපහාසාත්මක ලෙස පත්‍රිකා බෙදා හැරීම , එක්සත් ජාතික පක්ෂ කාර්යාලයට බලෙන් ඇතුළු වීම, පහරදීමට තැත් කිරීම, ආදී කරුණු කිහිපයක් එම පැමිණිලි වල සඳහන් ව ඇතැයි මාධ්‍ය ප්‍රකාශකවරයා වැඩිදුරටත් සඳහන් කළේය.