(ජේ.කේ.එල් චාමින්ද)

ගාලු වරායට නෞකා මගින් රැගෙන එනු ලබන ක්ලින්කර් ඇතුළු භාණ්ඩ වල බර කීරිම සඳහා යොදාගනු ලබන තරාදිය දැනට වසර හතරක පමණ  කාලයක සිට සවිකර නොමැති බව ගාලු වරායේ වෘත්තිය සමිති නිලධාරිහු පැවසූහ.

මේ බව සොයා බැලීමට වරාය සංවර්ධන රාජ්‍ය ඇමති කනක හේරත් සහ ඇමැති රමේෂ් පතිරණ යන මහත්වරු ගාලු වරායේ නිරීක්ෂණ චාරිකාවක නිරත වූහ.

වරාය වෘත්තිය සමිති නියෝජතයින් විසින් මෙම තරාදිය පිළිබඳ ඇමතිවරුන් දැනුවත් කළ අතර ලොරි රථ පිටින් ක්ලින්කර් කිරීම සඳහා යොදාගන්නා විශාල තරාදිය අලුත්වැඩියා කර ඇතත් වරායේ සවිකර නොමැති බවද වෘත්තිය සමිති නිලධාරිහු ඇමතිවරුන්ට පෙන්වා දුන්හ. 

මෙය ටොන් 100 ක පමණ බර කිරීමට හැකි විශාල තරාදියක් බවත් තරාදිය නොමැති නිසා බර කිරීමේ කටයුතු සිදුකරනු ලබන්නේ ඇස්මට්ටමින් බලා බවත්  ඔවුහු පැවසූහ.

මෙම තරාදිය කඩිනමින් වරාය තුළ ඉදිකරන ලෙස ඇමතිවරුන් දෙදෙනා එම අවස්ථාවේ බලධාරින්ට උපදෙස් ලබා දුන්හ.

මීට පෙර වරායේ තිබූ තරාදිය 2004 වර්ෂයේදී විනාශ වී ඇති අතර නැවත 2005 වර්ෂයේ දී කොළඹ වරායෙන් පැරණි තරාදියක් ගෙනවිත්  එය අලුත්වැඩියාකර සවිකර ඇත.

2014 සහ 2015 යන වර්ෂවලදී  ගාලු වරාය සංවර්ධන කිරීමේ දී මෙම තරාදිය තිබූ ස්ථානයෙන් ගලවා ඉවත්කර ඇත. ඉන්පසු මේ දක්වා මෙම තරාදිය ගාලුවරායේ ඉදිකර නොමැති  බව වරාය වෘත්තිය සමිති නියෝජිතයෝ පැවසූහ.

මේ පිළිබඳව ගාල්ල වරායේ උසස් නිලධාරියකු මෙසේ පැවසීය.

      ‘‘මෙම තරාදිය සවිකරන ස්ථානය ගැන පසුගිය කාලයේ විවිධ  ප්‍රශ්න තිබිලා තියෙනවා. ඇස්මට්ටමින් බලා බර කිරන්නේ නැහැ.එක බොරු කතාවක්  නෞකාවකට ක්ලින්කර් පටවන්නේ කිරලා. නැවත අවස්ථා දෙකකදී පමණ  අතරමග දී පරීක්ෂා කිරීම් සිදුවෙනවා.  නෞකාවකට භාණ්ඩ පැට වූ පසු ගණන් හදන ක්‍රමයක් තියෙනවා. නෞකාව මිලිමීටර් කියක් ගිලිතියෙනවාද  නෞකාවේ බර අඩුකරලා උඩුපුම තෙරමකුත් එක්ක තමයි ගණන් බලන්නේ.

මේ තරාදිය කඩිනමින්  සවිකිරිමට  අවශ්‍ය සැලසුම් කරලා තියෙනවා. අවශ්‍ය කොන්ක්‍රිට් ඇණවුම් කරලා තියෙනවා. මේ තරාදිය 2005 සිට 2015 දක්වා  අවුරුදු 10ක්  එක දිගට  ප්‍රයෝජන ගත්තා. 

මේ තරාදිය නැවත සවි කිරීමේ දී  යම් ප්‍රමාදයක් වි තිබුණත් තරාදිය නැවත සවිකිරීම  සඳහා අවශ්‍ය මූලික කටයුතු සිදුකර තිබෙනවා‘‘ යැයි එම නිලධාරියා පැවසීය.