(බිමල් ශ්‍යාමන් ජයසිංහ)

මහා පරිමාණ මත්ද්‍රව්‍ය ජාවාරම්කරුවකු වන "අරුග්ගොඩ සලිදු" නැමැත්තාට අයත් රුපියල් කෝටි 45 කට අධික වටිනාකමින් යුතු හෙරොයින් මත්කුඩු තොගයක් වෑන් රථයකින්   ප්‍රවාහනය කරමින් සිටි හමුදා සෙබළු දෙදෙනෙකු හොරණ දික්හේනපුර ප්‍රදේශයේදී ඊයේ රාත්‍රීයේ  අත්අඩංගුවට ගත් බව  පානදුර  වලාන දූෂණ මර්දන ප්‍රහාරක ඒකකය කියයි.

දකුණු පළාතේ සංවිධානාත්මක අපරාධකරුවෙකු හා පාතාල නායකයකු වන මිදීගම චින්තක හෙවත් "හරක් කටා" නමැත්තාගෙන් මත්කුඩු තොගය  ලබාගෙන  දක්ෂිණ අධිවේගී මාර්ගය ඔස්සේ   හොරණ දික්හේනපුර ප්‍රදේශයේ දී තවත් පුද්ගලයකුට ලබාදීම සඳහා පැමිණෙමින් සිටියදී  ලද තොරතුරක් අනුව සැකකරුවන් දෙදෙනා අත්අඩංගුවට ගත් බව පොලිසිය කියයි.

යුද හමුදාවට අයත් සුඛෝපභෝගී වෑන් රථයකින් මත්කුඩු කිලෝ 45කට අධික ප්‍රමාණයක් ප්‍රවාහනය කරමින් සිටියදී සැකකරුවන් සමඟ පොලිසිය බාරයට ගෙන ඇත.  

හමුදා සෙබළුන් දෙදෙනා අත්අඩංගුවට ගන්නා අවස්ථාවේදී හමුදා නිල ඇඳුමින් සැරසී සිටි බව පොලිසිය කියයි.

අත්අඩංගුවට ගත් හමුදා සෙබලුන් දෙදෙනා අත්තිඩිය සහ මරදාන හමුදා කඳවුරු දෙකට අනියුක්තව  සේවය කරන්නන් බවත් වෑන් රථය අත්තිඩිය  හමුදා කඳවුරේ බ්‍රිගේඩියර්වරයකුට අයත් එකක් බවත් සිදුකළ මූලික විමර්ශනවලදී අනාවරණය වී ඇත.