කොවිඩ් -19 වසංගතයට ගොදුරුවීමෙන් ඉන්දීය වෛද්‍යවරු 201 දෙනෙකු මියගොස් තිබේ. ඉන්දීය වෛද්‍ය සංගමයේ මහලේකම් වෛද්‍ය ආර්.වී අසෝකන් මහතා උපුටා දක්වමින් එරට ඒ.එන්.අයි පුවත්සේවය මේ බව වාර්තා කර ඇත.
 
එසේම තවත් වෛද්‍යවරුන් 17 ,064 දෙනෙකු එම වයිරස ආසාදනය වී රෝහල්වලට ඇතුළත් නොවී සිටින බවද ඉන්දීය වෛද්‍ය සංගමයේ මහලේකම්වරයා කියා සිටී.
 
එබැවින් වෛද්‍යවරුන්ට සහ ඔවුන්ගේ පවුල්වල සාමාජිකයින්ට අවශ්‍ය ප්‍රතිකාර ලබා දීමට ක්‍රියාකරන ලෙස, අග්‍රාමාත්‍ය නරේන්ද්‍ර මෝදී වෙත ලිපියක් යොමු කරමින් එම සංගමය ඉල්ලා සිටී.
 
ඉන්දීය වෛද්‍ය සංගමයේ මහලේකම් වෛද්‍ය ආර්.වී. අශෝකන් ඒ.එන්.අයි පුවත් සේවය වෙත වැඩිදුරටත් අදහස් දක්වමින් කියා සිටියේ “වසංගතයක් මධ්‍යයේ වෛද්‍යවරුන්ට සිදුවන්නේ කුමක්ද යන්න පිළිබඳව අවධානය යොමු කිරීම සඳහා අපි අගමැතිට ලිපියක් ලිව්වා. අසනීප වී සිටින වෛද්‍යවරුන්ට ප්‍රතිකාර සඳහා අවධානයක් යොමුවී නැහැ.ඔවුන් රෝහල්වලට පවා ඇතුළත් කර නැහැ. ඔවුන්ට විශේෂ අවධානයක් හා ප්‍රමුඛතාවයක් ලබා දිය යුතුයි. ආසාදිත වෛද්‍යවරුන් 17, 064 ක් සිටින අතර අද වෛද්‍යවරුන් 201 ක් මියගිහිං”
 
පසුගිය පැය 24 තුළදී කොරෝනා ආසාදිතයින් 64,000ක් හඳුනාගෙන ඇති අතර මේ වනවිට ඉන්දියාවෙන් හමු වී ඇති මුළු ආසාදිතයින් ගණන 2,153,010.
 
(ඒ.එන්.අයි. පුවත් සේවය ඇසුරෙනි)
125