(ජයන්ත සමරකෝන්)
 
කාන්තාවන් ලෙස පෙනී සිටිමින් ගණිකා වෘත්තියේ යෙදී ඇතැයි කියන පිලිපීන ජාතිකයන් 7දෙනෙකු සහ යුක්රේන ජාතික කාන්තාවක කොල්ලුපිටියේ හෝටලයක නවාතැන් ගෙන සිටියදී අද(25) අත්අඩංගුවට ගෙන ඇත.
 
ආගමන විගමන දෙපාර්තමේන්තුවේ නිරීක්ෂණ හා බුද්ධි අංශ නිලධාරීන් කණ්ඩායමක් විසින් මෙම පිරිස අත්අඩංගුවට ගෙන තිබේ.
 
මෙවැනි පිරිසක් අත්අඩංගුවට ගෙන ඇත්තේ ප්‍රථම වතාවට බවද එම දෙපාර්තමේන්තුව කියයි.
 
ඉකුත් 1වැනිදා සිට රටවල් රැසක විදේශිකයන්ට සංචාරක වීසා නොමිලයේ ලබාදීමේ අවස්ථාව උපයෝගී කරගෙන මොවුන් මෙරටට පැමිණ ඇතැයිද ආගමන විගමන දෙපාර්තමේන්තුවේ මාධ්‍ය ප්‍රකාශක බී.ජී. ගයාන් මිලින්ද මහතා පැවසීය.
 
ඔවුන් අන්තර්ජාලය මරමා තම ඡායාරූප ප්‍රදර්ශනය කරමින් මිල ගණන් පවා සඳහන් කර ගැනුම්කරුවන් ලබාගෙන ඇතැයිද, එක් පැයකට රුපියල් 25,000ක් අයකර ඇතැයිද ඒ මහතා කීය.
 
ගමන් බලපත්‍රවල සඳහන් මෙම පිරිමි පුද්ගලයින් ශල්‍යකර්ම මගින් ශරීරය වෙනස් කර කාන්තාවන් ලෙස ගණිකා වෘත්තියේ යෙදෙමින් විශාල වශයෙන් මුදල් උපයා ඇති බවද පරීක්ෂණවලදී හෙළි වී තිබේ.
 
සැකකරුවන් සහ සැකකාරිය මේ වනවිට මිරිහාන රැඳවුම් කඳවුරේ රඳවා ප්‍රශ්න කරමින් පවතී.