(ප්‍රියාණි මංගලිකා)
             
පස් ව්‍යාපාරිකයෙකු ගෙන් අල්ලසක්  ගනිද්දී කොළඹ අල්ලස් හෝ දූෂණ චෝදනා විමර්ශන ඒකකය විසින් අත්අඩංගුවට ගත්  නිකවැරටිය ප්‍රාදේශීය සභාවේ මන්ත්‍රීවරයා මේ මස  15   දින දක්වා රිමාන්ඩ් කරන ලෙස නිකවැරටිය මහෙස්ත්‍රාත් සසිකා ලක්මාලි දසනායක මහත්මිය අද (3) නියෝග කළාය.

මෙසේ රිමාන්ඩ් බාරයට පත් කෙරුණේ කොටවෙහෙර ,මීවැල්ලෑව , කීනව  ප්‍රදේශයේ  පදිංචි  එච්.එම්.ටී.හේරත් නැමති යුද හමුදා විශ්‍රාමික සැකකාර  සභා මන්ත්‍රීවරයෙකි.

මෙම සැකකාර මන්ත්‍රීවරයා කොබෙයිගනේ ප්‍රදේශයේ හෝටලයක දී පස් ව්‍යාපාරිකයෙකුගෙන්  රුපියල්  425,000 පමණ මුදලක් අල්ලස් ලෙස ගැනීමට යාමේදී  සැකකාර මන්ත්‍රීවරයා අත්අඩංගුවට ගැනීම සිදුකර තිබිණි.

ශ්‍රී ලංකා නිදහස් පක්ෂ ප්‍රාදේශීය සභා  මන්ත්‍රීවරයකු වන සැකකාර මන්ත්‍රීවරයා, ඉකුත් මහා මැතිවරණයේ දී ශ්‍රී ලංකා පොදුජන පෙරමුණ පක්ෂයට එක්ව ඇති බවද  ඒ හේතුව නිසා මන්ත්‍රීවරයාගේ  ශ්‍රී ලංකා නිදහස් පක්ෂයේ පක්ෂ  සාමාජිකත්වය අහෝසි කර මන්ත්‍රී ධූරයෙන් ඉවත් කිරීම සඳහා විනය පරීක්ෂණයක් ද සිදු වෙමින් පවතින බවද දේශපාලන ආරංචි මාර්ග සඳහන් කළේය.
සැකකාර මන්ත්‍රීවරයා කටුපොත  පොලීසිය මගින් නිකවැරටිය අධිකරණයට  ඉදිරිපත් කෙරිණි .