2015 ජනාධිපතිවරණය ඉතාම තීරණාත්මක මැතිවරණයක් වෙන බව කාට කාටත් තේරුම් ගිහින් තිබුණු දෙයක්. එක්සත් ජාතික පක්ෂය පැත්තෙන් අපිට ඒක ඉතාම තීරණාත්මක වුණා. මොකද එක පිට ජනාධිපතිවරණ හතරක් අපි ජයග්‍රහණය කරගන්න බැරුව ඉඳපු අවස්ථාවක් නිසා. ඒ කියන්නේ අවුරුදු විසිහතරක් විතර එක්සත් ජාතික පක්ෂයේ කෙනෙකුට රටේ ජනාධිපති පුටුවෙ වාඩිවෙන්න හම්බවුණේ නෑ. ඒක නිසා 2015 ජනාධිපතිවරණය කොහොම හරි ජයග්‍රහණය කරන්න ඕනෑ කියන අදහස තමයි අපි හැම දෙනාගේම හිත්වල තිබුණේ.


අපේ පක්ෂයේ බිම් මට්ටමේ ශක්තිය ක්‍රම ක්‍රමයෙන් වැඩි කර ගන්න ඕනකමක් ඒ වෙනකොට විශාල වශයෙන් අපිට තිබුණා. සිවිල් සංවිධාන රැසක් එකට එකතු කරගෙන සමගි බලවේගයක් අපි සූදානම් කළා. මේ අතරෙ 2014 මැද හරියේ දවසක පක්ෂ නායක රනිල් වික්‍රමසිංහ යෝජනා කළා ජනාධිපතිවරණය වෙනුවෙන් අපේ උපාය උපක්‍රම පිළිබඳව සාකච්ඡා කරන්න දවසක හමුවක් යොදාගමු කියලා.


මේ හමුවට ආරාධනා ලැබුණේ ස්වල්ප දෙනෙකුට විතරයි. රනිල් වික්‍රමසිංහගෙ ප්‍රධානත්වයෙන් පැවැත්වුණු මේ හමුවට මමත් එක්ක කබීර් හෂීම්, මලික් සමරවික්‍රම, රවී කරුණානායක, මංගල සමරවීර, එරාන් වික්‍රමරත්න, හර්ෂ ද සිල්වා ඇතුළු කීප දෙනෙක් තමයි සහභාගී වුණේ. මේ සාකච්ඡාව පැවැත්වුණේ කොළඹ ගලදාරි හෝටලේ. උදේ හමුව පටන් අරගෙන රෑ වෙනකම් හරි සාකච්ඡා කරලා මේ වැඬේ එක දවසෙන් ඉවර කරගමු කියලා තමයි සැලසුම් කළේ.


අපි උදේ ආහාර ගන්න අතරෙම සාකච්ඡාව ආරම්භ කළා. ගලදාරි හෝටලේ විශේෂ කාමරයක් අපිට මේ සඳහා සූදානම් කරලා දුන්නා. සාකච්ඡාව පටන් අරගෙන විවිධ දේවල් කතාබහ කරමින් යන අතරතුර මම යෝජනාවක් හැටියට නායකතුමාට කිව්වා අපිට ඕන 2015 ජනාධිපතිවරණය දිනන්න නම් මම මේ කියන කාරණයට අවධානය යොමු කරන්න කියලා. මම කිව්වා මේ දැන් යන විදියට ගිහිල්ල නම් අපිට කවදාවත් දිනන්න හම්බවෙන්නේ නෑ ඒක නිසා අපි වහාම ඇති කළයුතු වෙනස්කම් කීපයක් තියෙනවා කියලා. ඒ වෙනස්කම් කරන්නේ නැතුව නම් ජනාධිපතිවරණය දිනන එක ලේසිවෙන්නේ නෑ කියල මම සඳහන් කළා. මම කිව්වා ඔය යෝජනා කරන වැඩ ටික පිළිගන්නව නම් ඒ ටික ක්‍රියාත්මක කරලා බලමු කියලා. රනිල් වික්‍රමසිංහ මගෙන් ඇහුවා මොනවද ඒ යෝජනා කියලා. මම කිව්වා පළමුව කාරණය මේ වෙද්දි එක්සත් ජාතික පක්ෂය බෙදිලා ඉන්න එකට විසඳුමක් හොයමු කියලා. රනිල් පාර්ශවය සජිත් පාර්ශවය කියලා දෙකට බෙදිලා තිබුණේ. ඒක නිසා ඔක්කොටෝම කලින් මේ බෙදීම අවසන් කරලා එක්සත් ජාතික පක්ෂය දැන් ඇත්තටම එක්සත් කියල රටට පෙන්නමු කියලා. සජිත් ප්‍රේමදාස මේ ඡන්දෙට හවුල් කරගන්නේ නැතුව අපිට තව දුරටත් යන්න බෑ කියල මම කිව්වා. එහෙම වුණොත් සජිත් වටා පෙළ ගැහුණු පාක්ෂිකයෝ අපෙන් ඈත්වෙන්න පුළුවන්. රණසිංහ ප්‍රේමදාස කෙරෙහි ළැදියාවක් තියෙන පාක්ෂිකයන්ගෙ සහාය ලබාගන්න නම් සජිත්ව මේ සඳහා අවශ්‍යමයි කියලා මම පෙන්නලා දුන්නා. ඒක නිසා රනිල් - සජිත් විරසකය අවසන් කරමු කියලා මම යෝජනා කළා. 


දෙවැනි කාරණය හැටියට මම කිව්වෙ රනිල් වික්‍රමසිංහ මාධ්‍ය එක්ක රණ්ඩුවලට යාම වහාම නැවැත්විය යුතුයි කියලා. මොකද ඒ වෙනකොට මාධ්‍ය ආයතන කීපයක් එක්කම රනිල් වික්‍රමසිංහ එච්චර හොඳ ගනුදෙනුවක් නොවෙයි තිබුණේ. මොන විවේචන තිබුණත් මාධ්‍ය එක්ක ප්‍රසිද්ධියේ රණ්ඩුවට යෑමෙන් නරක ප්‍රතිරූපයක් හැදෙන එක ජනාධිපතිවරණයට නරකට බලපාන්න පුළුවන් කියල මන් කිව්වා. මම කිව්ව උපක්‍රමශීලීව මේ තරහ මරහ අමතක කරලා ජනාධිපතිවරණයට මාධ්‍ය එක්ක ගමනක් යමු කියලා. මොකද මාධ්‍යයට ඡන්දයකදී බොහෝ බලපෑම් කරන්න පුළුවන් ඒක අපි හොඳින්ම දැකපු කාරණයක්. රනිල් වික්‍රමසිංහ මේ ගැනත් විවිධ තර්ක ගෙනාවා. ඒත් මම දිගින් දිගටම කියා හිටියා මාධ්‍ය අනවශ්‍ය විදියට තරහ කරගන්න එක ඉදිරි ජනාධිපතිවරණයේදී අනිවාර්යෙන්ම නරක අතට බලපාන්න පුළුවන් කියලා.  


අවසානයේ ඒකත් නායකතුමා පිළිගත්තා. ඊළඟට ඇහුවා මොකක්ද මගේ තුන්වැනි යෝජනාව කියලා. මම කිව්වා දැනට තියෙන පක්ෂ යාන්ත්‍රණය ජයග්‍රහණයක් ගන්න පුළුවන් මට්ටමේ යාන්ත්‍රණයක් නෙවෙයි කියලා. මේ සම්ප්‍රදායික වැඩපිළිවෙළ ටිකක් වෙනස් කරල බලමු කියලා ඒ සඳහා මොකක්ද කරන්න ඕනෑ, වෙනස කියලා නායකතුමා ඇහුවා. මම කිව්වා රට පුරා තියෙන ඡන්ද පොළවල්වල දහදාහක් දිනන වැඩසටහනක් හදන්න ඕන කියලා. සාමාන්‍යයෙන් රටේම ඡන්දපොළවල් පහළොස්දාහක් විතර තමයි තියෙන්නේ. මේකෙන් දහදාහක් දිනා ගන්නවා කියන්නේ ජයග්‍රහණය සහතිකයි. ඒ ඉලක්කයට වැඩ කරමු කියලා මම කිව්වා. ආසනයක්, දිස්ත්‍රික්කයක් දිනන්න ඉලක්ක කරනවට වඩා ඡන්දපොළක් ඉලක්ක කරගෙන වැඩ පිළිවෙළක් හදමු කියලා මම යෝජනා කළා. මේ සඳහා ඡන්දපොළකට ප්‍රබල චරිතයක් සූදානම් කරන්න ඕන. දිස්ත්‍රික් සංවිධායක, ආසන සංවිධායක වගේ ඡන්දපොළ සංවිධායක ජාලයකුත් පත් කරන්න ඕන කියලා. ඒ ඒ ඡන්ද පොළ ජයග්‍රහණය කරවීම ඒ පුද්ගලයගෙ වගකීම. පහළින්ම පටන් ගත්තම මේ වැඬේ කරන්න ලේසියි කියලා මම පෙන්නල දුන්නා. 


මෙතැනදි ආසන සංවිධායකවරු එහෙම මේකට එක එක විරෝධතාවන් ගෙනෙයි නේද කියලා නායකතුමා ප්‍රශ්න කළා. මම කිව්වා එහෙම පෙන්වන්න ආසන සංවිධායකවරුන්ගෙ මූලිකත්වයෙන්ම මේ ඡන්ද පොළ සංවිධායකවරු පත්කරන වැඬේ ක්‍රියාත්මක කරමු කියලා. ඒ වුණත් මේ ඡන්දපොළ සංවිධායකවරු මෙහෙයවීමේ බලය සිරිකොතට තියාගමු කියලත් මම කිව්වා. ඒ වගකීම සිරිකොත තුළ මම බාරගන්නම් කියලා මම කීවා. රනිල් වික්‍රමසිංහ ඒ යෝජනාවටත් එකඟ වුණා. මේ යෝජනා තුන පදනම් කරගෙන තමයි ජනාධිපතිවරණය ගෙනියන්න සූදානම් වුණේ. මම මේ යෝජනා කරද්දි සාකච්ඡාවෙ ඉදපු අයත් ඒ අයගෙ අදහස් පළ කළා. විවිධ අදහස් තිබුණත් මගේ යෝජනා තුන පොදුවේ හැමෝම පිළිගත්තා. රනිල් කිව්වෙ තිස්ස එහෙනම් මේ වැඩ තුනට මූලිකත්වය අරගෙන වැඩ කරන්න කියලා. ඒ අනුව අපි එදා ඉඳලම වැඩ පටන් ගත්තා.

 

 

 


තව කොටසක් ලබන සතියට.

 


ප්‍රියන්ත කොඩිප්පිලි