(මීරිගම විශේෂ - පුෂ්පකුමාර මල්ලවආරච්චි)
රියැදුරා කෙටි පණිවිඩ යවමින් බසය පදවද්දී මගීන්  ජීවිතයත් මරණයත් අතර ගමනක යෙදුණු අවස්ථාවක් පසුගිය ඉරිදා ගම්පහ හා යක්කල අතරදී දැකගත හැකි විය.

වේලාව රාත්‍රි 7.45 ට පමණය. කිරිඳිවැල දක්වා යන පෞද්ගලික බසය ගමන් ඇරඹුවේ දුම්රියෙන් පැමිණි මගීන්ද ගොඩවීමෙන් පසුවය.  රියැදුරු ගමනේ යෙදුනේ එක් අතකින් සුක්කානම කරකවමිනි. අනෙක් අතේ නවීන පන්නයේ ජංගම දුරකතනයකි. 

තනි අතින් රිය පදවමින් ජංගම දුරකතනයෙන් කිසිවකු හා කෙටි පණිවිඩ යැවීමේ යෙදුණු අයුරු මගීන්ට දැක ගත හැකිවිය. මගී ජීවිත රියැදුරු දෑතට බාරයි කීවාට මේ බසයේ ජීවිත බාරවී තිබුණේ රියැදුරුගේ එක් අතකටය.

යක්කල නගරය පසුකරන තුරුම රියැදුරාගේ ගමන එසේ විය. යක්කලදී බසයෙන් බැස්ස මගීන් දෙදෙනකු “ඇති යාන්තන් ජීවිතේ බේරගෙන බැහැගත්තායි” එකිනෙකාට පැවසුවේ සුසුමක් හෙළමිනි.