(කරන්දෙණිය එම්. සුසිල් ප්‍රියන්ත)

මහ පාරේ මගීන් රස්තියාදු කළ මගී ප්‍රවාහන බස් රථ රියැදුරකුට එල්ලවූ මගීන්ගේ දැඩි විරෝධය හමුවේ කොන්දොස්තර මහතා මග දමා බස් රථය ගමනාන්තය දක්වා ගෙනගිය අපූරු පුවතක් පෙරේදා (11) පෙරවරුවේදී දකුණෙන් වාර්තා විය.

එය කොළඹ සිට ගාල්ල දක්වා ධාවනය වූ පෞද්ගලික මගී ප්‍රවාහන බස් රථයකි. ගාලු පාර දිගේ කොළඹ සිට වාද්දුව දක්වා පැමිණි එම බස්රථය වාද්දුව පොලිස් ස්ථානය ඉදිරිපිට පාර අයිනේ නතර වූයේ මාර්ග නීති රීති කඩකිරීම වෙනුවෙන් වාද්දුව පොලිසිය විසින් මීට පෙර දිනක එම බස් රථයේ රියැදුරට ගසන ලද දඩ මුදලකට අදාළ ලදු පත ලබාදීමටය. එය පොලිසියට ගෙන ගියේ බස් රථයේ කොන්දොස්තරවරයා විසින්ය.

මේ සඳහා ඔහුට විනාඩි විස්සක පමණ කාලයක් ගතවිය. එතෙක් එම බස් රථයේ පැමිණි මගීන්ට මහමග රස්තියාදුවීමට සිදුවිය. යළිත් බස් රථය ධාවනය විය. බස් රථය කොස්ගොඩට ළඟා වූ පසුද කොස්ගොඩ පොලිසිය ඉදිරිපිට නතර කෙරිණ. බස් රථයේ කොන්දොස්තර කොස්ගොඩ පොලිසියට දිව ගියේය. ඔහු එසේ දිවගොස් විනාඩි දහයක් පහළවක් ගත විය. කොන්දොස්තර එන පාටක් නොදුටු එම බස් රථයෙන් යාපනයේ සිට නිවාඩු පැමිණෙන හමුදා සෙබළෙක් තමන් මහමග මෙසේ රස්තියාදු කිරීම පිළිබඳව බස් රථයේ රියැදුරාට දෝෂාරෝපණය කළේය. එයින් දිරිමත්වූ මගීන්ද බස් රථය ධාවනය කරන ලෙසට රියැදුරාට බලකළ හෙයින් තමන්ට වෙන්න යන ඉරණම ඉවෙන්මෙන් වටහාගත් රියැදුරා බස් රථය පණගන්වා එය ගාල්ල දක්වා ධාවනය කළේ සිය සගයාවූ කොන්දොස්තරද කොස්ගොඩ පොලිසියේ සිටියදීමය. පසුව කොන්දොස්තර වෙනත් බස් රථයක නැගී ගාල්ලට පැමිණ සිය බස්රථයට ගොඩ වූ බවද වාර්තා විය.