(තිහගොඩ - උපසේන ලියනගම)
පරෙස්සමට තිබූදේ ඈලියාවට ගියා යැයි කියන ආකාරයේ සිදුවීමක් පසුගියදා අසන්නට ලැබුණේ දේවාලයක් නිසා ප්‍රසිද්ධියට පත් නගරාසන්න ප්‍රදේශයකිනි.

උසස් පෙළ හදාරන තම රූමත් දියණිය පසුපස සල්ලාලයකු එන බව ආරංචි වූ පියා පොලිසියේ සේවය කරන තම ඥාතිපුතකුට කීවේ මේක මහ කරදරයක් නිසා දියණියට රැකවල් සලසන ලෙසටය. ඒ කටයුත්ත බාරගත් ඥාතිපුතා ඇය සමග නිල ඇඳුමෙන් සැරසී ආගිය විට සල්ලාලයා සිය කටයුතු අතහැර දැමූ බව පෙනුණි.

විවාහකයකු වූ ඥාති පුත්‍රයාට මේ පිළිබඳව ස්තුති කළ පියා ඉමහත් සතුටට පත්විය.

එහෙත් පසුගියදා උපකාරක පන්තියකට ගිය දියණිය ආපසු නොපැමිණි නිසා ඒ ගැන සොයා බැලූවිට සිය ඥාති පුත්‍රයාද අතුරුදන්වී ඇති බව සැලවිය.

ඔහු සිය පවුලට ද කොකා පෙන්නා අලුත් කැදැල්ලක් තනා ගැනීමට සිය දියණිය සමඟ ඈත පළාතකට ගොස් ඇති බව දැනගත් පියාට දෙවියන් සිහිවුණාලු.