(ඇහැලියගොඩ රාමචන්ද්‍ර ගුණසේකර)
හෙල්මට් නොමැතිව යතුරුපැදියක පිටුපස අසුණේ ගමන් කළ අයෙකුගේ උප්පර වැට්ටියකට හසු වී පොලිස්  නිලධාරියෙකු නිරුත්තර වීමේ පුවතකි මේ.


 තම මව රෝහල්ගතව අසාධ්‍ය තත්ත්වයෙන් පසුවන හෙයින් ඇයට  අවශ්‍ය දිවා ආහාරය සහ අත්‍යාවශ්‍ය ඔසුවක් රැගෙන තරුණයකු යතුරුපැදියෙන් රෝහලට යද්දී බස් නැවතුම් පොළක තමන්ට ගණිතය ඉගැන්වූ ගුරුවරයා  සිටිනු දැක යතුරුපැදිය නතර කළ තරුණයා ගුරුවරුයා යතුරුපැදියේ පිටුපස හිඳුවාගෙන ඉදිරියට ගමන් කළේය. ගුරුවරයා ගමන්ගත්තේ හෙල්මට් නොමැතිවය.


 පෙර මඟ වංගුවකදී පොලිස් නිලධාරීන් වාහන  පරීක්‍ෂාවේ යෙදෙමින් සිටි අතර යතුරුපැදියේ පිටුපස හෙල්මට් නොමැතිව සිටි ගුරුවරයා දැක යතුරු පැදිය නතර කළ පොලිසිය ඒවනවිට නවතා තිබු වාහන යතුරුපැදිවල දඩ කොළ ලියමින්, ලියවිලි පරීක්‍ෂා කරමින් සිටියේය.


තමා කළ වරද නිසා ගෝලයා අමාරුවේ වැටෙන්නට යන බව දත් ගුරුවරයා පොලිස් නිලධාරියා වෙත ගොස් බැගෑපත්ව “සර් මේ ළමයාගේ අම්මා අසාධ්‍ය තත්ත්වයෙන් රෝහලේ නතර කර ඇති නිසා අම්මාට ආහාර හා අත්‍යවශ්‍ය බෙහෙතක් හදිසියේම ගෙනියන්න වෙලා. ඒ නිසා ළමයාට  අම්මාගේ බත් එකයි බෙහෙතයි දීලා ආපසු එන්න කියමු. ළමයා එනතුරු මම මෙතන ඉන්නම්.” කීවේය. පොලිස් නිලධාරියාද කෑමපාර්සලය බෙහෙත් කවරය පරීක්‍ෂා කර ඒවා භාරදී එන ලෙස නියම කළේය.


 මේ අතර නවතා තිබූ වාහන පරීක්‍ෂා කර අවසන් වී ගුරුවරයයා ළඟට පැමිණි පොලිස් නිලධාරියා “ඇයි  මහත්තයෝ හෙල්මට් නැතිව ආවේ. දඩයක් ලියන්නයි වෙන්නේ” යනුවෙන් පැවසුවේය. තවම යතුරුපැදිය පැමිණ නැත.


 “සාජන් මහත්තයෝ මම ආවේ පයින්”  කෝ මෙතන යතුරුපැදියක් තියනවයැ. මම යනවා. පයින් යන්නත් හෙල්මට් ඕනෑ දැයි සමච්චලයක් කළ ගණිත ගුරුවරයා පා ගමනින් ඉදිරියට ගියේය.