(තිහගොඩ උපසේන ලියනගම)
මත් වතුරට ඇබ්බැහි වී සිටි ඔහු ගම්පහ නගරාසන්නයේ ජීවත් වූ සිව් දරු පියෙකි.


කොරෝනා වසංගතය නිසා සියලුම තැබෑරුම් වසා දැමීම නිසා පීඩාවට පත්ව සිටි ඔහුට තරමක් ඈතින් පිහිටි උප නගරයක තැබෑරුමක් රහසේ විවෘත කර ඇති බවට ආරංචියක් ලැබිණි.


ඇඳිරි නීතිය මැද එහි යාමට උපායක් සිතූ ඔහු තම යතුරු පැදියේ ගෑස් ටැංකිය බැඳගත්තේ ඊට පිළියමක් ලෙසටය.


තැබෑරුම් හල අසලට ගිය විට එහි ගනුදෙනුකරුවන් නොවූවත් ඉදිරිපස දොර විවෘතව පැවති නිසා යතුරු පැදිය නවතා තැබෑරුමට ගොස් එබී බැලූ විට ඔහුට තරු පෙණුනා.


එහි සිටියේ පොලිස් නිලධාරීන් කණ්ඩායමකි.


‘‘ඇයි? පොලිස් නිලධාරියා විමසුවෙන් තැතිගත් ඔහු 
‘‘මම සර්, ගෑස් ගහන්න යන ගමන් මේක ඇරපු නිසා එබිල බැලුවා.’’ කීවේ බියෙන් වෙවුලමිනි.


‘‘ඇයි, ගෑස් ටැංකියට අරක්කු ගහන්නද?’’ ඇසූ පොලිස් නිලධාරියා ඔහුට දැඩි සේ අවවාද කොට ඇඟ පතද පරීක්‍ෂාවෙන් පසු මුදා හැරියෙන් ඔහු යළිත් ගෑස් ටැංකිය සහිත යතුරු පැදියට නැග්ගේ දුක්මුසු බැල්ලමක් හෙළමිනි.